راج ناتھ سنگھ فضائیہ کی اکیڈمی، ڈنڈیگل میں فضائیہ کے کیڈٹس کو کمیشن فراہم کریں گے

نئی دہلی، 09 جون (یو این آئی) وزیر دفاع راج ناتھ سنگھ ہفتہ کو حیدرآباد میں واقع ڈنڈیگل فضائیہ کی اکیڈمی میں فضائیہ کے کیڈٹس کے 217 ویں کورس کی مشترکہ پاسنگ آؤٹ پریڈ کا معائنہ کریں گے اور کیڈٹس کو کمیشن فراہم کریں گے۔
فضائیہ نے منگل کو بتایا کہ فوجی ڈسپلن اور مہارت سے بھرپور یہ تقریب ہندوستانی فضائیہ کی مختلف شاخوں کے فلائٹ کیڈٹس کی کمیشن سے قبل کی تربیت کے کامیاب اختتام کی علامت ہوگی۔ تقریب کے دوران وزیر دفاع تربیت پانے والوں کو ‘راشٹرپتی کمیشن’ عطا کریں گے۔ اس تقریب میں کامیابی سے تربیت مکمل کرنے والے ہندوستانی فضائیہ کے فلائٹ کیڈٹس کے ساتھ ساتھ ہندوستانی بحریہ، ہندوستانی کوسٹ گارڈ اور ویتنام کے افسران و زیرِ تربیت اہلکاروں کو ‘ونگز’ اور ‘بریویٹس’ دیے جائیں گے۔ یہ مشترکہ پاسنگ آؤٹ پریڈ نیشنل ڈیفنس اکیڈمی (این ڈی اے)، پونے کی خواتین کیڈٹس کے پہلے بیچ کے کمیشن حاصل کرنے کی بھی علامت ہوگی، جنہوں نے 30 مئی 2025 کو تربیت مکمل کی تھی اور شاخ کے لحاظ سے مخصوص تربیت کے لیے فضائیہ اکیڈمی میں شامل ہوئی تھیں۔
وزیر دفاع فلائنگ، نیوی گیشن اور گراؤنڈ ڈیوٹی برانچز میں مجموعی میرٹ لسٹ میں پہلی پوزیشن حاصل کرنے والے فلائٹ کیڈٹس کو ‘پریزیڈنٹ پلیک’ پیش کریں گے۔ پروگرام میں پریڈ کے آغاز کے موقع پر آکاش گنگا اور ایئر واریئر ڈرل ٹیم (اے ڈبلیوڈی ٹی ) کا مظاہرہ ہوگا، اور اس دوران فضائیہ کے سربراہ (سی اے ایس) ایئر چیف مارشل اے پی سنگھ کی قیادت میں فلائی پاسٹ بھی کیا جائے گا۔ فلائی پاسٹ میں چار طرح کے تربیتی طیارے دکھائے جائیں گے، جن میں پیلاٹس پی سی-7 ایم کے-II، ہاک، کرن اور چیتک طیارے شامل ہیں۔ سخوئی-30 ایم کے آئی، سارنگ ہیلی کاپٹر اور سوریہ کرن ایروبیٹک ٹیم کے فضائی کرتب اس تقریب کی خاص توجہ کا مرکز ہوں گے۔