نہیں صاحب ہم یہ نہیں کہہ رہے ہیں اور …….اور بالکل بھی نہیں کہہ رہے ہیں کہ بی جے پی اور پی ڈی پی میں کوئی گٹھ جوڑ ہے ……. ہم ایسا نہیں کہہ رہے ہیں اور اس لئے نہیں کہہ رہے ہیں کہ ……. کہ پوری قوم نے ان دونوں جماعتوں میں گٹھ جوڑ دیکھا ہے ……. ایسا گٹھ جوڑ جو کوئی نہیں بھول سکتا ہے ……. بالکل بھی نہیں بھول سکتا ہے ۔ رہی بات یہ کہ ہم آج ان دونوں جماعتوں کی بات کیوں کررہے ہیں تو صاحب ہم اس لئے کررہے ہیں کہ دونوں……. ان دونوں جماعتوں نے منہ کھولا ہے ……. اپنا اپنا منہ کھولا ہے اور کچھ بولا ہے ……. بولا کیا ہے ‘ اصل میں تولا ہے ……. عمرعبداللہ کی سرکار کی کار کردگی کو تولا ہے ……. الگ الگ تولا ہے لیکن ……. دونوں نے ایک ساتھ بولا ہے ۔ میڈم جی کاکہنا ہے کہ این سی کی سرکار نے بھاری منڈیٹ سے غداری کی ہے اور ……. اور اس لئے کی ہے کیونکہ یہ جماعت نوجوانوں کے……. جموں کشمیر کے نوجوانوں کے مسائل حل کرنے میں ناکام ہو ئی ہے ……. اور ایسا ہی ……. کم و بیش ایسا ہی کچھ بی جے پی کابھی کہنا ہے کہ اس کے شرما صاحب کے مطابق عمرعبداللہ سرکار کہیں نظر ہی نہیں آئےگی …….اوریہ ایک بات شرما صاحب سچ کہہ رہے ہیں اور صحیح بھی کہ یہ جناب تو آسام میں تھے اور آسام میں انہیں یقینا عمرسرکار نظر نہیں آتی ……. بالکل بھی نہیں آتی ۔ یقینا ًاب یہ واپس جموں لوٹ آئے ہیں ‘ لیکن اثر تو ابھی آسام کا ہی ہو گا اور …….اور سو فیصد ہو گا ۔ ہم تو امید کرتے ہیں کہ ……. کہ جب یہ آسام کے سحر سے باہر آئیں گے تو …….تو انہیں سرکار ……. عمرسرکار نظر آئےگی اور …….اور اس لئے آئیگی کہ آجکل عمر سرکار جموں میں ہی اور …….اور بہت جلدسرینگر کا رخ کرے گی کیا ہمیں بھی یہاں عمرسرکار نظر نہیں آئےگی اس کیلئے صاحب ہمیں تھوڑا انتظار کرنا پڑے گا ……. تھوڑا‘ زیادہ نہیں ‘ بالکل بھی نہیں ۔رہی بات منڈیٹ سے غداری کی تو میڈم جی !اگر کسی سے غداری ہو ئی ہے اور ہمیشہ سے ہو ئی ہے تو ……. تو وہ بے چارے اس بد نصیب منڈیٹ سے ہو ئی ہے اور……. اور پہلے دن سے ہوئی ……. ہر دور میں ہو ئی ہے ……. آپ اور آپ کے مرحوم والد محترم کے دور میں بھی ہو ئی ہے اور……. اور سو فیصد ہو ئی ہے ۔ ہے نا؟
