جنوبی اور شمال مشرقی ریاستوں کی نمائندگی کم کرنے کی بی جے پی کی چال کو ناکام بنا دیا: راہل

نئی دہلی، 18 اپریل (یو این آئی) کانگریس کے سابق صدر راہل گاندھی نے کہا ہے کہ بھارتیہ جنتا پارٹی (بی جے پی) کی حکومت نے جنوبی ہندوستان اور شمال مشرقی ریاستوں کی نمائندگی کم کرنے کی جو چال چلی تھی، اسے اپوزیشن کے اتحاد نے جمعہ کے روز لوک سبھا میں ناکام بنا دیا ہے۔
مسٹر گاندھی نے ہفتہ کو سوشل میڈیا ایکس پر ایک پوسٹ میں کہا کہ انڈیا اتحاد نے پارلیمنٹ میں ملک کے اتحاد اور سالمیت کی آواز بن کر جمہوریت کا دفاع کیا ہے۔
انہوں نے لکھا، "بی جے پی نے پارلیمنٹ میں تمل ناڈو اور جنوب کی دیگر ریاستوں سمیت شمال مشرقی خطے کی نمائندگی کو حد بندی (ڈی لیمیٹیشن) کے ذریعے کم کرنے کی واضح کوشش کی تھی۔ ہم نے پارلیمنٹ میں اسے روکا اور ایک بڑے حملے کو ناکام بنا دیا ہے۔”
مسٹر گاندھی نے مزید کہا کہ انڈیا اتحاد تمل شناخت کی حفاظت کرے گا اور ہندوستان کے اتحاد، تنوع اور اسے مضبوط بنانے والی ہر آواز کا دفاع کرے گا۔