سمندری جہازوں اور ان کے مال کی انشورنس کے لیے سرکاری گارنٹی کا فیصلہ اہم: راج ناتھ سنگھ

نئی دہلی، 18 اپریل (یواین آئی) وزیر دفاع راج ناتھ سنگھ نے ہندوستان کے برآمدی اور درآمدی سامان کی ترسیل میں شامل سمندری جہازوں اور ان پر لدے مال کی انشورنس کے لیے سرکاری گارنٹی دینے کے فیصلے کو ایک اہم قدم قرار دیتے ہوئے کہا ہے کہ اس سے ملک کا تجارتی نظام مضبوط ہوگا۔
مسٹر سنگھ نے تقریباً 13 ہزار کروڑ روپے کے سرکاری سمندری انشورنس گارنٹی فنڈ کے قیام سے متعلق کابینہ کے فیصلے پر سوشل میڈیا پر ایک پوسٹ میں کہاکہ”وزیر اعظم نریندر مودی کی صدارت میں مرکزی کابینہ نے 12,980 کروڑ روپے کی سرکاری گارنٹی کے ساتھ ‘ہندوستان سمندری انشورنس پول’ کے قیام کو منظوری دے کر ایک اہم فیصلہ کیا ہے۔”
انہوں نے کہا کہ یہ فیصلہ ہندوستان کے سمندری تجارت کے لیے کم لاگت اور مسلسل انشورنس کوریج کو یقینی بنائے گا، جس سے درآمد و برآمد کے عمل کی سلامتی اور استحکام کو مزید مضبوطی ملے گی۔
وزیر دفاع نے مزید کہاکہ "یہ ہندوستان کے لیے ایک مضبوط، محفوظ اور چیلنجز سے نمٹنے کے قابل تجارتی نظام کی سمت میں ایک بڑا قدم ہے۔”