ایجنسیز
سرینگر؍۱۰؍اپریل
محکمہ خوراک، شہری رسد و امورِ صارفین کشمیر نے ضلع اننت ناگ میں ایل پی جی کی تقسیم میں مبینہ بے ضابطگیوں اور قانونی خلاف ورزیوں پر تین گیس ایجنسیوں کو شوکاز نوٹس جاری کیے ہیں۔
اسسٹنٹ ڈائریکٹر اننت ناگ (ایگزیکٹو مجسٹریٹ فرسٹ کلاس) کے دفتر کی جانب سے جاری نوٹسز کے مطابق یہ کارروائی معائنوں، صارفین کی شکایات اور سرکاری رپورٹس کی بنیاد پر عمل میں لائی گئی، جن میں خدمات کی فراہمی میں سنگین خامیوں کی نشاندہی کی گئی تھی۔
محکمہ کے مطابق متعدد علاقوں میں صارفین کی جانب سے بار بار شکایات موصول ہوئیں کہ تصدیق شدہ بکنگ کے باوجود ایل پی جی سلنڈروں کی فراہمی میں غیر معمولی تاخیر ہو رہی ہے، بعض مقامات پر یہ تاخیر۶۰دن تک پہنچ گئی۔
مزید برآں، صارفین کی شکایات کا یا تو ازالہ نہیں کیا گیا یا انہیں مناسب طور پر حل نہیں کیا گیا، جو شکایت ازالہ نظام میں غفلت کی نشاندہی کرتا ہے۔
نوٹس میں اس بات پر بھی سخت تشویش ظاہر کی گئی کہ بعض معاملات میں سلنڈر کی اصل فراہمی کے بغیر جعلی یا غلط ڈیلیوری کنفرمیشن پیغامات جاری کیے گئے۔
ایک ایجنسی پر یہ الزام بھی عائد کیا گیا ہے کہ وہ متعلقہ حکام کی ہدایات کے باوجود غیر مجاز مقامات سے ایل پی جی سلنڈروں کی تقسیم کر رہی تھی۔
محکمہ نے کہا کہ یہ اقدامات ایل پی جی (ریگولیشن) آرڈر۲۰۰۰، لازمی اشیاء ایکٹ۱۹۵۵(خصوصاً دفعہ ۷) اور صارفین کے تحفظ کے قانون۲۰۱۹کی خلاف ورزی کے زمرے میں آتے ہیں۔
تمام متعلقہ ایجنسیوں کو ہدایت دی گئی ہے کہ وہ تین دن کے اندر اپنی وضاحت متعلقہ دستاویزات کے ساتھ پیش کریں، بصورت دیگر متعلقہ قوانین کے تحت کارروائی عمل میں لائی جائے گی۔
