اجی چھوڑئے کہ کشمیر کے…. یو ٹی کے حکام کیا کہہ رہے ہیں اور کیا نہیں …. وہ کیا ہے کہ ہمارے حکام بہت کچھ کہتے رہتے ہیں لیکن…. لیکن صاحب اس کا یہ تو مطلب نہیں اور…. اور بالکل بھی نہیں کہ کشمیر کے حکام جو کچھ کہہ رہے ہیں ہمیں اس پر عمل کرنا ہے…. ہمیں ان کی کہی ہر ایک بات پر سر تسلیم خم کرنا ہے…. نہیں صاحب ایسا نہیںہے اور…. اور بالکل بھی نہیں ہے …. اتنے بھی ہم تابعدار اور فرمانبردار نہیں …. بالکل بھی نہیں ہیں اور اس لئے بھی نہیں ہیں کہ ہمارے حکام ‘ہمارے حاکم اصل میں ٹھہرے سیاستدان …. پختہ سیاستدان اور آپ تو جانتے ہی ہیں کہ سیاستدانوں کی عادت ہو تی ہے کہ وہ بغیر سر اور پاؤں کے باتیں کرتے ہیں…. ایسی باتیں جن پر عمل ہو رہا ہے ‘ جن پر عمل ہو گا بھی یا نہیں ‘ انہیں اس کی فکر نہیں ہوتی ہے…. بالکل بھی نہیں ہوتی ہے کہ …. کہ اگر انہیں کسی چیز کی فکر ہو تی ہے تو صرف اس ایک بات کی کہ انہوں نے جو بات کی ہے آیا وہ بات اخبار میں ایک بڑی ہیڈ لائن کے ساتھ شائع ہو ئی ہے یا نہیں ۔جیسے اپنے حکام کی یہ بات کہ ہمیں کشمیر کے شہر خستہ کو پالی تھین سے مکت کرنا ہے…. پالی تھین سے پاک کرنا ہے ۔ آپ چاہیں توس ایک بات کو بھی صرف نظر کریں ‘ کسی کھاتے میں نہ ڈال دیں لیکن….لیکن ہماری صلاح ہے کہ اپنے کشمیر کے حکام کی اس ایک بات کو آپ سنجیدہ لیں…. اس پر عمل کرنے کی کوشش بھی کریں کہ …. کہ بات ہماری ہے‘ اپنی ہے‘ اپنے اس شہر خستہ کی ہے جو پہلے ہی خستہ حال ہے …. اورپالی تھین کے استعمال اور ہول سیل میں استعمال سے اس کا حال سچ میں بے حال ہو رہا ہے اور…. اور اللہ میاں کی قسم یہ ہمارے لئے کوئی اچھی خبر نہیں ہے…. بالکل بھی نہیں ہے ۔پالی تھین کا استعمال شہر خستہ کا مستقبل خطرے میں ڈال رہا ہے …. ہماری آبگاہوںکے وجود کو اس کے استعمال سے شدید خطرہ لاحق ہے کہ ویسے بھی ان آبگاہوں کا ہم نے پہلے ہی دم گھٹ کے رکھ دیا ہے …. اب بھی ان میں تھوڑی سی جان باقی ہے اور …. اور اگر ہم نے پالی تھین کے استعمال کو ترک کردیا تو…. تو بھیا ممکن ہے کہ ہم اپنے شہر خستہ کو ماحولیاتی تباہی سے بچا سکیں اور…. اور اگر آپ اپنے شہر کو بچانا چاہتے ہیں تو…. تو ایک بار اپنے حکام کی اس ایک بات کو پوری طرح مان لیجئے …. اس پر پوری طرح عمل کیجئے ۔ پالی تھین کا استعمال روک لیجئے اور مکمل طور پر روک لیجئے ۔ ہے نا؟
