جسپریت بمراہ ورک لوڈ مینجمنٹ کے لیے ‘سینٹر آف ایکسی لینس’ طلب: آئی پی ایل سے قبل فٹنس پر کام شروع

ممبئی: 25 مارچ (یواین آئی ) ہندوستانی کرکٹ ٹیم کے مایہ ناز فاسٹ بالر جسپریت بمراہ اپنے ورک لوڈ مینجمنٹ کے سلسلے میں بی سی سی آئی کے بنگلورو میں واقع سینٹر آف ایکسی لینس) کو رپورٹ کریں گے۔
ذرائع کے مطابق بمراہ کی سی او ای میں موجودگی کا بنیادی مقصد ان کی طاقت اور کنڈیشننگ پر کام کرنا ہے۔ بی سی سی آئی کی میڈیکل ٹیم نے یہ خصوصی پلان جولائی میں ہندوستان کے دورہ انگلینڈ کو مدنظر رکھتے ہوئے تیار کیا ہے، جہاں ٹیم انڈیا کو پانچ ٹی-20 اور تین ون ڈے میچز کی سیریز کھیلنی ہے۔بمراہ سینٹر آف ایکسی لینس میں اپنی بالنگ کی مشقیں جاری رکھیں گے اور توقع ہے کہ وہ جلد ہی اپنی آئی پی ایل فرنچائز ممبئی انڈینز کے ساتھ جڑ جائیں گے۔ وہ 29 مارچ کو کولکتہ نائٹ رائیڈرز کے خلاف ممبئی کے ہوم گراؤنڈ پر ہونے والے پہلے میچ کے لیے دستیاب ہوں گے۔
جسپریت بمراہ نے حال ہی میں ٹی-20 ورلڈ کپ میں ہندوستان کے ٹائٹل کے دفاع میں کلیدی کردار ادا کیا۔ نیوزی لینڈ کے خلاف فائنل میچ میں انہوں نے صرف 15 رنز دے کر 4 وکٹیں حاصل کیں، جس پر انہیں ‘پلیئر آف دی میچ’ قرار دیا گیا۔ ہندوستان اس شاندار کارکردگی کی بدولت فائنل 96 رنز سے جیتنے میں کامیاب رہا۔آئی پی ایل کی تاریخ میں صرف ممبئی انڈینز کی نمائندگی کرنے والے بمراہ اب تک 148 میچوں میں 186 وکٹیں حاصل کر چکے ہیں۔ وہ لاستھ ملنگا کا ریکارڈ توڑنے سے محض 9 وکٹیں دور ہیں، جو ممبئی کے لیے سب سے زیادہ وکٹیں لینے والے باؤلر ہیں۔دوسری جانب، ممبئی انڈینز نے وانکھیڑے اسٹیڈیم میں اپنی چھٹی آئی پی ایل ٹرافی جیتنے کے مشن کا آغاز کر دیا ہے۔ ٹیم نے آخری بار 2020 میں ٹائٹل جیتا تھا اور وہ 2013 کے بعد سے اپنے سب سے طویل انتظار کو ختم کرنے کے لیے پرعزم ہیں۔