کرکٹ کے میدان پر چیلنجز قبول کرنا میری فطرت ہے:جسپریت بمراہ

نئی دہلی، 12 مارچ(یواین آئی ) ہندوستانی کرکٹ ٹیم کے مایہ ناز فاسٹ بالر جسپریت بمراہ، جنہوں نے ہندوستان کو ٹی 20 ورلڈ کپ جتوانے میں کلیدی کردار ادا کیا، کا کہنا ہے کہ انہیں ہمیشہ سے مشکل اور چیلنجنگ ذمہ داریاں لینا پسند رہا ہے اور یہی وہ وجہ ہے جس نے انہیں کرکٹ کی جانب راغب کیا۔
ہندوستانی کرکٹ کنٹرول بورڈ (بی سی سی آئی) کی جانب سے جاری کردہ ایک ویڈیو میں بمراہ نے اپنے خیالات کا اظہار کرتے ہوئے کہا
"میں کبھی بھی ذمہ داریوں سے پیچھے نہیں چھپنا چاہتا، بلکہ میں میدان میں ہر مشکل صورتحال کا مقابلہ کرنے کے لیے تیار رہتا ہوں۔ میں نے کرکٹ کا آغاز ہی اسی لیے کیا تھا کہ میں کچھ الگ کر سکوں۔ جب میں ٹیم کے لیے کچھ مختلف کرتا ہوں تو مجھے جو خوشی ملتی ہے، اس سے بہتر کوئی دوسرا احساس نہیں ہو سکتا۔”
بمراہ نے اپنی یادوں کو تازہ کرتے ہوئے مزید کہا کہ انہوں نے کرکٹ کا آغاز احمد آباد سے کیا اور گجرات کے لیے کھیلتے ہوئے اپنی پہچان بنائی۔ انہوں نے خوشی کا اظہار کیا کہ وہ اب اسی میدان پر ورلڈ کپ کھیل رہے ہیں اور ‘مین آف دی میچ’ قرار پائے۔
بمراہ نے اپنی کامیابی کا سہرا خاندان اور خوش قسمتی کے نام کرتے ہوئے کہا”اس بار میری والدہ اور میرا بیٹا اسٹیڈیم میں موجود تھے، جو میرے لیے بہت خاص لمحہ تھا۔ میں خدا کا شکر گزار ہوں کہ ہم نے مسلسل دوسری بار ورلڈ کپ جیتنے کا اعزاز حاصل کیا۔
واضح رہے کہ آئی سی سی مینز ٹی 20 ورلڈ کپ کے فائنل میں جسپریت بمراہ ہندوستان کے کامیاب ترین باؤلر ثابت ہوئے۔ انہوں نے اپنے 4 اوورز کے اسپیل میں تباہ کن بالنگ کرتے ہوئے 4 وکٹیں حاصل کیں، جس کی بدولت ہندوستان اپنے ٹائٹل کا دفاع کرنے اور مسلسل دوسری بار عالمی چیمپئن بننے میں کامیاب رہا۔