پاکستان اور نیوزی لینڈ ٹاکرے سے قبل بارش: کیوی ٹیم کا پریکٹس سیشن متاثر

کولمبو،20 فروری ( یو این آئی)ٹی ٹوئنٹی ورلڈ کپ کے سپر ایٹ مرحلے کے اہم میچ سے ایک روز قبل کولمبو کے آر پریماداسا اسٹیڈیم میں موسلا دھار بارش نے نیوزی لینڈ ٹیم کی تیاریوں میں خلل ڈال دیا۔نیوزی لینڈ کی ٹیم کا تین گھنٹے کا بھرپور تربیتی سیشن شیڈول تھا۔ کھلاڑیوں نے دو گھنٹے تک پریکٹس کی، لیکن اچانک شروع ہونے والی تیز بارش کے باعث سیشن روکنا پڑا۔
بارش کی شدت کو دیکھتے ہوئے گراؤنڈ اسٹاف نے فوری طور پر پچ اور آؤٹ فیلڈ کو کورز سے ڈھانپ دیا۔ ٹیم مینجمنٹ نے مزید بارش اور گراؤنڈ گیلا ہونے کے باعث باقی ماندہ ٹریننگ سیشن منسوخ کر کے کھلاڑیوں کو ڈریسنگ روم واپس بھیج دیا۔
اگرچہ کیوی کھلاڑی بارش کے باعث اپنی مکمل تیاری (خصوصاً آخری گھنٹے کی ڈرلز) مکمل نہ کر سکے، لیکن کوچنگ اسٹاف کا کہنا ہے کہ وہ کل کے میچ کے لیے پرامید ہیں۔ انتظامیہ کی جانب سے توقع ظاہر کی گئی ہے کہ 21 فروری کو میچ کے روز موسم سازگار رہے گا۔