ویسٹ انڈیز نے اٹلی کو 42 رن سے شکست دی

کولکاتہ، 19 فروری (یو این آئی) شائی ہوپ (75) کی طوفانی نصف سنچری اننگز کے بعد شمر جوزف (چار وکٹ) اور میتھیو فورڈ (تین وکٹ) کی بہترین کارکردگی کی بدولت ویسٹ انڈیز نے جمعرات کو ٹی-20 ورلڈ کپ کے 37ویں مقابلے میں اٹلی کو 42 رنوں سے شکست دے دی۔
166 رنوں کے ہدف کا تعاقب کرنے اتری اٹلی کے بلے باز ویسٹ انڈیز کے گیند بازی حملے کے سامنے کھل کر نہ کھیل سکے اور وقفے وقفے سے وکٹیں گنواتے رہے۔ اٹلی کی پوری ٹیم 18 اوورز میں محض 123 رن ہی بنا سکی اور 42 رنوں سے مقابلہ ہار گئی۔ بنجامن میننٹی نے اٹلی کے لیے سب سے زیادہ 26 رن بنائے۔ ان کے علاوہ جے جے سمتس (24)، انتھونی موسکا (19) اور گرانٹ اسٹوارٹ 12 رن بنا کر آؤٹ ہوئے۔ اٹلی کے سات بلے باز دہائی کے ہندسے تک بھی نہ پہنچ سکے۔ ویسٹ انڈیز کے لیے شمر جوزف نے چار وکٹیں حاصل کیں۔ میتھیو فورڈ کو تین اور گڈاکیش موتی کو دو وکٹیں ملیں، جبکہ عقیل حسین نے ایک بلے باز کو آؤٹ کیا۔
اس سے قبل اٹلی نے ٹاس جیت کر پہلے گیند بازی کرنے کا فیصلہ کیا۔ بلے بازی کے لیے اتری ویسٹ انڈیز نے کپتان شائی ہوپ کی جارحانہ نصف سنچری کی مدد سے مقررہ 20 اوورز میں چھ وکٹوں کے نقصان پر 165 رنوں کا اسکور بنایا۔ ویسٹ انڈیز کا آغاز اچھا نہیں رہا اور اس نے 31 کے اسکور تک اپنی دو وکٹیں گنوا دیں۔ برینڈن کنگ (چار) اور شمرون ہٹمائر (ایک) رن بنا کر آؤٹ ہوئے۔
اس کے بعد روسٹن چیز نے شائی ہوپ کے ساتھ مل کر اننگز کو سنبھالا۔ دونوں بلے بازوں کے درمیان تیسری وکٹ کے لیے 64 رنوں کی شراکت داری ہوئی۔ 13ویں اوور میں بنجامن میننٹی نے روسٹن چیز (24) کو آؤٹ کر کے اس پارٹنرشپ کو توڑا۔ روومین پاول (نو) کو 15ویں اوور میں میننٹی نے اپنا شکار بنایا۔ اگلے ہی اوور میں کرشن کالوگاماگے نے شائی ہوپ کو بولڈ کر کے پویلین بھیج دیا۔ شائی ہوپ نے 46 گیندوں میں چھ چوکوں اور چار چھکوں کی مدد سے 75 رنوں کی اننگز کھیلی۔ جیسن ہولڈر نو رن بنا کر آؤٹ ہوئے۔ شرفین ردرفورڈ نے 15 گیندوں میں دو چوکوں اور ایک چھکے کی مدد سے ناقابل شکست 24 رن بنائے۔ میتھیو فورڈ 16 رن بنا کر ناٹ آؤٹ رہے۔
اٹلی کی جانب سے بنجامن میننٹی اور کرشن کالوگاماگے نے دو دو وکٹیں حاصل کیں۔ تھامس ڈریکا اور علی حسن نے ایک ایک بلے باز کو آؤٹ کیا۔