رنجی ٹرافی سیمی فائنل:عاقب نبی نے تباہی پھیر دی، بنگال 99 رنز پر ڈھیر، جموں و کشمیر فائنل کے قریب

کلیانی، 17 فروری(یواین آئی )رنجی ٹرافی کے سیمی فائنل میں جموں و کشمیر کے با لرز نے تباہ کن کارکردگی کا مظاہرہ کرتے ہوئے بنگال کو دوسری اننگز میں محض 99 رنز پر آؤٹ کر دیا ہے۔ جموں و کشمیر کو فائنل میں پہنچنے کے لیے مجموعی طور پر 126 رنز کا ہدف ملا ہے، جس کے تعاقب میں تیسرے دن کے اختتام تک انہوں نے 2 وکٹوں پر 43 رنز بنا لیے ہیں۔ اب انہیں تاریخی جیت کے لیے مزید 83 رنز درکار ہیں۔
پہلی اننگز میں 328 رنز بنانے والی بنگال کی ٹیم دوسری اننگز میں ریت کی دیوار ثابت ہوئی۔ جموں و کشمیر کے تیز گیند باز عاقب نبی اور سنیل کمار نے بنگال کے بلے بازوں کو سنبھلنے کا موقع نہ دیا اور دونوں نے 4، 4 وکٹیں حاصل کر کے پوری ٹیم کو صرف 25.1 اوورز میں پویلین بھیج دیا۔
126 رنز کے آسان ہدف کے تعاقب میں بنگال کے اسٹار بالر آکاش دیپ نے شروع میں دو وکٹیں حاصل کر کے جموں و کشمیر کو دباؤ میں لانے کی کوشش کی، لیکن شبھم سنگھ پنڈیر (23 ناٹ آؤٹ) اور ونشج شرما (9 ناٹ آؤٹ) نے مزید کوئی نقصان نہیں ہونے دیا۔ جموں و کشمیر اب فائنل میں جگہ بنانے کے لیے انتہائی مضبوط پوزیشن میں ہے۔