ہند۔پاک میچ میں دباؤ کو نظر انداز کرنا ضروری ہے: بابر اعظم

کولمبو، 14 فروری (یو این آئی) پاکستانی کرکٹ ٹیم کے مایہ ناز بلے باز بابر اعظم نے کہا ہے کہ ہند۔پاک میچ میں شائقین کی توقعات غیر معمولی حد تک بڑھ جاتی ہیں، اس لیے کھلاڑیوں کو میدان سے باہر کی باتوں سے خود کو دور رکھنا چاہیے۔کرک انفو کو دیے گئے انٹرویو میں بابر اعظم کا کہنا تھا کہ اس میچ پر نہ صرف پاکستان اور ہندوستان بلکہ دنیا بھر کے کرکٹ شائقین کی نظریں مرکوز ہوتی ہیں۔
انہوں نے کہا کہ وہ کئی ہند۔پاک میچز کا حصہ رہ چکے ہیں اور اس تجربے سے یہی سیکھا ہے کہ میدان سے باہر ہونے والی گفتگو پر توجہ نہ دی جائے اور مکمل طور پر پُرسکون رہ کر کھیل پر فوکس کیا جائے۔
بابر اعظم کے مطابق ہندوستان کے خلاف میچ کا اپنا ایک الگ جوش اور ماحول ہوتا ہے، تاہم وہ جونیئر کھلاڑیوں کو یہی مشورہ دیتے ہیں کہ اعتماد کے ساتھ کھیلیں اور غیر ضروری دباؤ نہ لیں، کیونکہ جتنا پراعتماد رہیں گے، اتنا ہی بہتر کارکردگی دکھا سکیں گے۔
واضح رہے کہ بابر اعظم 2017 کی چیمپئنز ٹرافی 2017 سے اب تک ہندوستان کے خلاف متعدد بڑے مقابلوں میں شریک رہے ہیں۔ چیمپئنز ٹرافی 2017 کے فائنل اور ٹی ٹوئنٹی ورلڈ کپ 2021 میں ہندوستان کے خلاف اہم کامیابیوں میں بھی ان کا نمایاں کردار رہا تھا۔