نیوزی لینڈ نے یو اے ای کو 10 وکٹوں سے بدترین شکست دے دی

چنئی، 10 فروری (یو این آئی ) ٹی-20 ورلڈ کپ کے 11ویں مقابلے میں نیوزی لینڈ نے یکطرفہ مقابلہ میں متحدہ عرب امارات (یو اے ای) کو 10 وکٹوں سے روند ڈالا۔ ٹم سیفرٹ (89 ناٹ آؤٹ) اور فن ایلن (84 ناٹ آؤٹ) کی طوفانی بیٹنگ کی بدولت کیوی ٹیم نے 174 رنز کا ہدف محض 15.2 اوورز میں حاصل کر لیا۔ 174 رنز کے چیلنجنگ ہدف کے تعاقب میں نیوزی لینڈ کے اوپنرز نے یو اے ای کے بالنگ اٹیک کی دھجیاں اڑا دیں۔ دونوں بلے بازوں نے گراؤنڈ کے چاروں اطراف دلکش شاٹس کھیلے اور میچ کو وقت سے پہلے ختم کر دیا۔ٹم سیفرٹ نے محض 42 گیندوں پر 12 چوکوں اور 3 چھکوں کی مدد سے 89 رنز کی جارحانہ اننگز کھیلی۔ دوسرے اینڈ سے فن ایلن نے 50 گیندوں پر 5 چوکوں اور 5 چھکوں کی مدد سے 84 رنز بنا کر ٹیم کی فتح میں برابر کا حصہ ڈالا۔ نیوزی لینڈ نے یہ ہدف 28 گیندیں قبل ہی بغیر کوئی وکٹ گنوائے حاصل کر لیا۔نیوزی لینڈ کی اس بڑی فتح نے گروپ ڈی میں ان کی پوزیشن کو مزید مستحکم کر دیا ہے اور ان کے نیٹ رن ریٹ میں بھی زبردست اضافہ ہوا ہے۔ اس سے قبل متحدہ عرب امارات (یو اے ای) نے کپتان محمد وسیم (ناقابل شکست 66) اور علی شان شرفو (55) کی عمدہ بلے بازی کی بدولت نیوزی لینڈ کے خلاف مقررہ 20 اوورز میں 6 وکٹوں کے نقصان پر 173 رنز کا چیلنجنگ اسکور کھڑا کیا تھا ہے۔
چنئی کے ایم اے چدمبرم اسٹیڈیم میں یو اے ای نے ٹاس جیت کر پہلے بیٹنگ کا فیصلہ کیا۔ اگرچہ آغاز کچھ اچھا نہ تھا اور دوسرے ہی اوور میں آرینش شرما صرف 8 رنز بنا کر پویلین لوٹ گئے، لیکن اس کے بعد کپتان اورعلی شان شرفو نے اننگز کو سنبھال لیا۔ محمد وسیم اور علی شان شرفو نے دوسری وکٹ کے لیے 107 رنز کی شاندار شراکت قائم کر کے نیوزی لینڈ کے بالرز کو دباؤ میں رکھا۔ 15ویں اوور میں مچل سینٹنر نے علی شان شرفو کو آؤٹ کر کے اس جوڑی کو توڑا۔ انہوں نے 47 گیندوں پر 5 چوکوں اور 2 چھکوں کی مدد سے 55 رنز بنائے۔ محمد وسیم آخر تک کریز پر موجود رہے اور 66 رنز کی ناقابلِ شکست اننگز کھیلی۔ مینک کمار نے بھی 13 گیندوں پر 21 رنز کی تیز رفتار اننگز کھیلی۔نیوزی لینڈ کی جانب سے میٹ ہینری نے 2 جبکہ جیکب ڈفی، مچل سینٹنر، لوکی فرگیوسن اور گلین فلپس نے ایک ایک وکٹ حاصل کی۔