پاکستان نے ہندستان کے خلاف میچ کے بائیکاٹ کا فیصلہ واپس لیا

لاہور، 10 فروری (یواین آئی) حکومت پاکستان نے 15 فروری کو کولمبو میں ہندستان کے خلاف ہونے والے ٹی ٹوئنٹی ورلڈ کپ کے گروپ میچ میں ان کی ٹیم کے بائیکاٹ کے فیصلے کو واپس لے لیا ہے "حکومت پاکستان نے سوشل میڈیا پلیٹ فارم ایکس پر جاری ایک پوسٹ میں کہا کہ، ’’دوست ممالک کی درخواست کے پیش نظر، انہوں نے پاکستانی ٹیم کو ہندستان کے خلاف میچ کھیلنے کی اجازت دے دی ہے۔
پاکستان کرکٹ بورڈ (پی سی بی)، بنگلہ دیش کرکٹ بورڈ (بی سی بی) اور انٹرنیشنل کرکٹ کونسل (آئی سی سی) کے درمیان گزشتہ چند دنوں سے ہندستان کے خلاف میچ کے بائیکاٹ کے پاکستان حکومت کے فیصلے کو واپس لینے کے حوالے سے میٹنگز کا سلسلہ جاری تھا۔ اقتصادی نقطہ نظر سے یہ اس ورلڈ کپ کا سب سے زیادہ منافع بخش میچ ہے۔
پیر کی شام پی سی بی کے چیئرمین محسن نقوی نے کہا کہ ہندستان کے خلاف پاکستان کے میچ کا فیصلہ اگلے 24 سے 48 گھنٹوں میں آسکتا ہے۔اس سے چند منٹ پہلے، آئی سی سی نے بھی ایک بیان جاری کیا، جس میں اس نے بنگلہ دیش کے بارے میں اپنا موقف نرم کرتے ہوئے کہا کہ بنگلہ دیشی ٹیم پر ٹی20 ورلڈ کپ کے لیے ہندستان کے سفر سے انکار کرنے پر کوئی جرمانہ نہیں لگایا جائے گا۔
مزید برآں، انہیں 2028-2031 مرحلے میں ایک اضافی آئی سی سی ٹورنامنٹ کے لیے میزبانی کے حقوق بھی دیے گئے۔
بی سی بی نے ایک بیان جاری کرتے ہوئے پی سی بی کی حمایت پر شکریہ ادا کیا اور ان سے ہندستان کے خلاف اپنے میچ میں حصہ لینے کی اپیل کی۔