آئی سی سی ویمنز ٹی 20 رینکنگ: بنگلہ دیشی خواتین کی بڑی چھلانگ

دبئی ،27 جنوری (یو این آئی ) بنگلہ دیشی خواتین کرکٹ ٹیم، جو نیپال میں جاری آئی سی سی ویمنز ٹی 20 ورلڈ کپ کوالیفائر میں اب تک ناقابلِ شکست ہے، رینکنگ میں بھی چھا گئی ہے۔ اس عمدہ کارکردگی کی بدولت کئی کھلاڑیوں نے اپنی پوزیشنز میں نمایاں بہتری کی ہے۔ ایونٹ میں 156 رنز کے ساتھ دوسری ٹاپ اسکورر رہنے والی شرمین اختر نے 22 درجے ترقی پائی ہے اور اب وہ مشترکہ طور پر 35ویں نمبر پر آ گئی ہیں۔ انہوں نے امریکہ اور آئرلینڈ کے خلاف نصف سنچریاں اسکور کیں۔سبحانہ مستری مسلسل بہتر اسکورز کی بدولت 11 درجے اوپر آ کر 52 ویں پوزیشن پر پہنچ گئی ہیں۔
آئرلینڈ کی کپتان گیبی لیوس ایک درجے بہتری کے ساتھ 15ویں اور نیدرلینڈز کی سٹیر کالس 6 درجے ترقی کے ساتھ 48ویں نمبر پر آ گئی ہیں۔ بنگلہ دیشی اسپنر رابعہ خان، جنہوں نے کوالیفائر کے 4 میچوں میں 7 وکٹیں حاصل کیں، ایک درجہ بہتری کے ساتھ اب دنیا کی 14ویں بہترین بولر بن گئی ہیں۔فہیمہ خاتون 6 درجے ترقی کے ساتھ اب وہ 30ویں نمبر پر براجمان ہیں۔کیتھرین فریزر: اسکاٹ لینڈ کی نوجوان کھلاڑی نے 17 درجے لمبی چھلانگ لگائی اور 44 ویں نمبر پر آ گئیں۔