دوبئی// ہندوستانی تیز گیند باز جسپریت بمراہ انگلینڈ کے خلاف پہلے ون ڈے میں چھ وکٹیں لے کر ون ڈے رینکنگ میں نمبر ایک بولر بن گئے ہیں۔ اس کارکردگی کے بعد بمراہ پانچ مقام ترقی کرگئے ہیں اور چھٹے سے ٹاپ پوزیشن پر پہنچ گئے ہیں۔ انہوں نے ٹرینٹ بولٹ اور شاہین شاہ آفریدی کو پیچھے چھوڑ دیا جو اب بالترتیب دوسری اور تیسری پوزیشن پر ہیں۔
بمراہ نئی گیند کے ساتھ بہترین کارکردگی کا مظاہرہ کرتے ہوئے جوس بٹلر، جو روٹ، جیسن رائے اور لیام لیونگسٹن جیسے بلے بازوں کی وکٹیں لے رہے تھے۔ اس کے بعد سچن تنڈولکر نے ٹویٹ کیا کہ وہ اس وقت تمام فارمیٹس میں بہترین بولر ہیں۔
روہت شرما نے پہلے ون ڈے میں ناٹ آؤٹ 76 رنز بنائے اور وہ چوتھے نمبر پر ہیں۔ تیسرے نمبر پر وراٹ کوہلی ان سے ایک ریٹنگ پوائنٹ زیادہ ہیں۔ بابر اعظم اور امام الحق کی پاکستانی جوڑی بالترتیب پہلے اور نمبر دو پر ہے۔ پہلے ون ڈے میں ناٹ آؤٹ 31 رنز بنانے والے شیکھر دھون اب 12 ویں نمبر پر ہیں۔
تیسرے ٹی۔20 میں سنچری بنانے والے سوریہ کمار یادو ٹی 20 رینکنگ میں 44 مقام ترقی کرکے 5 نمبر پر پہنچ گئے ہیں اور وہ ٹی 20 میں ہندوستان کے ٹاپ بلے باز ہیں۔ اس کے ساتھ ہی ٹی۔ 20 سیریز میں صرف دو میچ کھیلنے کے بعد پلیئر آف دی سیریز بننے والے بھونیشور کمار ٹی۔20 بولنگ رینکنگ میں ٹاپ 10 میں واپس آ گئے ہیں اور وہ 8ویں نمبر پر ہیں۔ وہ ٹاپ 10 میں واحد ہندوستانی گیند باز ہیں۔ ٹی۔ٹوئنٹی میں جوش ہیزل ووڈ سرفہرست باؤلر ہیں۔ ون ڈے کی طرح ٹی۔ٹوئنٹی میں بھی بابر ٹاپ بلے باز ہیں۔
