بیٹسمینوں کا طوفان، ویبھو اور ایرون کی سنچریوں نے پروٹیز کے چھکے چھڑا دیے

بینوانی (جنوبی افریقہ)، 7 (یو این آئی )ہندوستان کی انڈر 19 ٹیم نے تیسرے یوتھ ون ڈے میں جنوبی افریقہ کے بولنگ اٹیک کے بخیئے ادھیڑ دیے ہیں۔ ویبھو سوریہ ونشی اور ایرون جارج کی برق رفتار سنچریوں اور ان کے درمیان 227 رنز کی ریکارڈ ساز اوپننگ پارٹنرشپ کی بدولت ہندوستان نے جنوبی افریقہ کو جیت کے لیے 394 رنز کا ہمالیہ جیسا ہدف دے دیا ہے۔
جنوبی افریقہ کا ٹاس جیت کر پہلے بولنگ کرنے کا فیصلہ اس وقت بھیانک خواب بن گیا جب ہندوستانی اوپنرز نے پہلی ہی گیند سے جارحانہ انداز اپنایا،
ویبھو سوریہ ونشی (127 رنز) نے صرف 23 گیندوں پر اپنی نصف سنچری مکمل کی۔ انہوں نے مائیکل کروس کیمپ کے ایک ہی اوور میں دو چوکوں اور دو چھکوں کی مدد سے 21 رنز بٹورے۔ انہوں نے اپنی سنچری محض 63 گیندوں پر مکمل کی اور مجموعی طور پر 74 گیندوں کی اننگز میں 10 چھکے اور 9 چوکے لگائے۔ایرون جارج (118 رنز) نے بھی دوسرے اینڈ سے بہترین بلے بازی کا مظاہرہ کیا اور شاندار سنچری اسکور کر کے ٹیم کی پوزیشن مستحکم کر دی۔
227 کے اسکور پر پہلی وکٹ گرنے کے بعد ویدانت ترویدی نے 34 رنز بنا کر رن ریٹ برقرار رکھا، تاہم وسطی اوورز میں جنوبی افریقی بولرز نے واپسی کی کوشش کی اور وقفے وقفے سے وکٹیں گرائیں۔ ابھی گیان کنڈو (21) اور کنشک چوہان (10) بڑی اننگز نہ کھیل سکے، لیکن آخری لمحات میں محمد عنان (28 ناٹ آؤٹ) اور ہینل پٹیل (19 ناٹ آؤٹ) نے تیزی سے رنز بنا کر اسکور کو 393/7 تک پہنچا دیا۔جنوبی افریقہ کی جانب سے این سونی سب سے کامیاب بولر رہے جنہوں نے 3 وکٹیں حاصل کیں، جبکہ جیسن راؤلز نے 2 کھلاڑیوں کو آؤٹ کیا۔ مائیکل کروس کیمپ، جنہوں نے ویبھو کے ہاتھوں مہنگا اوور کھایا تھا، صرف ایک وکٹ حاصل کر سکے۔