اسرائیلی فوج کا غزہ میں پناہ گزین کیمپ پر حملہ، 6 فلسطینی شہید

غزہ، 20 دسمبر (یو این آئی) اسرائیلی فوج نے غزہ کے مشرقی علاقے میں اسکول کی عمارت میں قائم ایک پناہ گزین کیمپ پر حملہ کیا ہے ، جس کے نتیجے میں 6 فلسطینی شہید جبکہ متعدد زخمی ہوگئے ۔
عرب خبر رساں ادارے کی رپورٹ کے مطابق اسرائیلی فوج کی جانب سے جنگ بندی معاہدے کی خلاف ورزی کا سلسلہ بدستور جاری ہے ۔
رپورٹس کے مطابق تازہ اسرائیلی حملوں میں اسکول کی عمارت میں قائم ایک پناہ گزین کیمپ کو نشانہ بنایا گیا جہاں زخمی ہونے والوں میں کئی معصوم بچے بھی شامل ہیں۔
دوسری جانب ڈبلیو ایچ او نے ممالک پر زور دیا کہ وہ غزہ کے مریضوں کے لیے دروازے کھول دیں۔
عالمی ادارہ صحت کے سربراہ نے خبردار کیا ہے کہ اگر غزہ کے مریض علاج کے لیے بیرون ملک جانے یا مقبوضہ مغربی کنارے میں طبی انخلاء سے گزرنے کے قابل نہیں ہوتے تو مزید جانیں ضائع ہو سکتی ہیں۔
سوشل میڈیا پر ایک پوسٹ میں ٹیڈروس اذانوم گیبریئسس نے کہا کہ ڈبلیو ایچ او اور اس کے شراکت داروں نے جنگ کے آغاز سے لے کر اب تک 10,600 سے زیادہ مریضوں کو غزہ سے نکالا ہے جن میں 5,600 سے زیادہ بچے بھی شامل ہیں۔
انہوں نے کہا کہ اس کے باوجود بہت سے مریض غزہ میں موجود ہیں جو مناسب صحت کی دیکھ بھال حاصل کرنے کے لیے انخلاء کے منتظر ہیں۔
غزہ میں فوج کی موجودگی کے مینڈیٹ پر تمام ملکوں سے بات کی، پاکستان کے آفر کے مشکور ہیں، مارکو روبیو
غزہ وزارت صحت کے مطابق، جولائی 2024 سے 28 نومبر 2025 کے درمیان طبی انخلاء کے انتظار میں 1092 مریض انتقال کر چکے ہیں تاہم، یہ تعداد ممکنہ طور پر کم بتائی گئی ہے ۔