یانسن نے چار وکٹ لیے، کلدیپ اور واشنگٹن ڈٹے رہے

گوہاٹی، 24 نومبر (یو این آئی) مارکو یانسن (چار وکٹ) اور سائمن ہارمر (دو وکٹ) کے جھٹکوں سے سنبھلتے ہوئے واشنگٹن سندر (ناٹ آؤٹ 33) اور کلدیپ یادو (ناٹ آؤٹ 14) نے جنوبی افریقی گیند بازوں کا ڈٹ کر مقابلہ کرتے ہوئے لنچ بریک تک ہندوستان کا اسکور سات وکٹ پر 174 رن تک پہنچا دیا ہے۔ تاہم ہندوستانی ٹیم ابھی جنوبی افریقہ کے پہلی اننگز میں بنائے گئے اسکور سے 315 رن پیچھے ہے۔
چائے کے وقفے کے بعد مارکو یانسن نے جنوبی افریقی گیندبازوں پر جوابی حملے کی کوشش میں کپتان رشَبھ پنت (سات) کو آؤٹ کر کے پویلین بھیج دیا۔ اس کے بعد یانسن نے نتیش کمار ریڈی (10) اور روندر جڈیجہ (چھ) کو آؤٹ کر کےہندوستان کو بڑے بحران سے دوچار کردیا۔ ایسے مشکل وقت میں واشنگٹن سندر اور کلدیپ یادو نے محاذ سنبھالا اور جارحانہ بلے بازی کا مظاہرہ کرتے ہوئے رن بنائے۔
اس سے پہلے، دوسرے ٹیسٹ میچ کے تیسرے دن کا پہلا سیشن یشسوی جیسوال اور کے ایل راہل کی اچھی شروعات کے باوجود جنوبی افریقی گیندبازوں کے نام رہا۔ سائمن ہارمر (دو وکٹ) کی قیادت میں جنوبی افریقی گیند بازوں نے چائے کے وقفے تک ہندوستان کے 102 کے اسکور پر چار وکٹیں لے کر میچ پر اپنی گرفت مضبوط کر لی۔
آج ہندوستان نے کل کے بغیر کسی نقصان کے نو رن کے اسکور سے آگے کھیلنا شروع کیا۔ یشسوی جیسوال اور کے ایل راہل کی جوڑی نے پہلی وکٹ کے لیے 65 رن جوڑے۔ اسی دوران یشسوی نے 85 گیندوں پر چھ چوکوں اور ایک چھکے کی مدد سے اپنی نصف سنچری مکمل کی۔ 22ویں اوور میں کیشو مہاراج نے کے ایل راہل کو آؤٹ کر کےہندوستان کو پہلا جھٹکا دیا۔ کے ایل راہل نے 63 گیندوں میں دو چوکوں کی مدد سے 22 رن بنائے۔
اس کے بعد 33ویں اوور میں سائمن ہارمر نے یشسوی جیسوال کو مارکو یانسن کے ہاتھوں کیچ آؤٹ کرا کے جنوبی افریقہ کو دوسری کامیابی دلائی۔ یشسوی جیسوال نے 97 گیندوں میں سات چوکے اور ایک چھکا لگاتے ہوئے 58 رن کی نصف سنچری کھیلی۔ 35ویں اوور میں ہارمر نے سائی سدرشن (15) کو آؤٹ کر کے پویلین بھیج دیا۔ اگلے ہی اوور میں یانسن نے دھرُو جُریل (صفر) کو آؤٹ کر کے پویلین بھیج دیا۔ بلے بازی کرنے آئے رشَبھ پنت نے جوابی حملہ کیا، ہارمر کے آتے ہی انہوں نے سیدھا چھکا جڑ دیا، لیکن چائے کے وقت تک ہندوستان پر بہت دباؤ تھا، پنت 6 رن پر تھے اور رویندر جڈیجہ ابھی کھاتہ نہیں کھول پائے تھے، تب بھی وہ 387 رن پیچھے تھے۔ اس سے پہلے ساؤتھ افریقہ نے اپنی پہلی اننگ میں 489 رنز کے بڑے اسکور کے ساتھ سبقت برقرار رکھی تھی۔