شبھمن گل سرکاری طور پر گوہاٹی ٹیسٹ سے باہر، پنت کپتان

گوہاٹی، 21 نومبر (یو این آئی) ہندوستان کے ٹیسٹ کپتان شبھمن گل گوہاٹی میں ہفتے سے جنوبی افریقہ کے خلاف شروع ہونے والے دوسرے ٹیسٹ سے باہر ہو گئے ہیں۔ کولکاتہ ٹیسٹ کے دوران گل کو گردن میں چوٹ لگی تھی اور وہ پورے میچ سے باہر رہے تھے۔
ہندوستان کے نائب کپتان رشبھ پنت اس میچ میں ہندوستانی ٹیم کی کپتانی کریں گے۔ کولکاتہ میں گل کے میدان چھوڑنے کے بعد بھی پنت نے کپتانی کی تھی، لیکن رسمی طور پر کپتان کی حیثیت سے یہ ان کا پہلا ٹیسٹ میچ ہوگا۔
کولکاتہ کے ایک اسپتال کی نگرانی میں کچھ وقت گزارنے کے بعد گل 19 نومبر کو گوہاٹی پہنچے تھے، لیکن اب یہ طے ہو گیا ہے کہ وہ میچ میں حصہ نہیں لیں گے۔ جمعہ کی صبح بی سی سی آئی کی طرف سے جاری بیان کے مطابق، گل اپنی چوٹ کی مزید جانچ کے لیے ممبئی جائیں گے۔
ای ایس پی این کرک انفو نے جمعرات کو ہی یہ بتایا تھا کہ اگر گل اتنی جلدی کھیلتے ہیں تو انہیں دوبارہ گردن میں کھنچاکی شکایت ہوسکتی ہے۔ اس لیے انہیں مزید آرام کا مشورہ دیا گیا ہے۔ یہ صورتحال جنوبی افریقہ کے خلاف 30 نومبر سے شروع ہونے والے تین ایک روزہ میچوں میں ان کے انتخاب کے امکانات پر بھی اثر ڈال سکتی ہے۔ اس سیریز کے لیے 23 نومبر کو ٹیم منتخب کیے جانے کی امید ہے۔
گل کا کوئی متبادل نامزد نہیں کیا گیا ہے، جس کا مطلب ہے کہ سائی سدرشن، دیودت پڑیکل اور نتیش کمار ریڈی میں سے کوئی ایک گل کی جگہ لے گا۔ تاہم، ٹیم کے توازن کو دیکھتے ہوئے ان میں سے کسی دو کو بھی جگہ مل سکتی ہے۔