نئی دہلی، 12 نومبر (یو این آئی) ہندوستانی بحریہ کے سربراہ ایڈمرل دنیش ترپاٹھی بدھ کے روز امریکہ کے چھ روزہ سرکاری دورے پر روانہ ہوئے ۔ بحریہ کے ترجمان کے مطابق اس دورے کا مقصد ہندوستان اور امریکہ کی بحری افواج کے درمیان مضبوط اور پائیدار بحری شراکت داری کو مزید مستحکم کرنا ہے ، جو ہند۔امریکہ دفاعی تعلقات کا ایک اہم ستون ہے ۔
دورے کے دوران ایڈمرل ترپاٹھی امریکی محکمۂ دفاع کے سینئر حکام سے ملاقات اور تبادلۂ خیال کریں گے ۔ وہ امریکی بحریہ کی اعلیٰ قیادت اور دیگر اعلی شخصیات سے بھی ملاقات کریں گے ، جن میں امریکہ انڈو۔پیسفک کمان کے کمانڈر ایڈمرل سیموئیل جے پاپارو اور امریکہ پیسفک فلیٹ کے کمانڈر ایڈمرل اسٹیفن ٹی۔ کوہلر شامل ہیں۔
ان ملاقاتوں کا مقصد بحری تعاون کا جائزہ لینا، آپریشنل سطح پر تعلقات کو مضبوط کرنا، دونوں بحری افواج کے درمیان معلومات کا تبادلہ بڑھانا اور بحری خطے میں نگرابئ کے نظام کو مستحکم کرنا ہے ۔
بحریہ کے سربراہ امریکہ کے اہم بحری اداروں اور آپریشنل کمانڈز کے ساتھ بھی ملاقاتیں کریں گے ۔ ان بات چیت کا محور ہند-بحرالکاہل خطے میں مشترکہ بحری ترجیحات، میلان (بحری مشق)جیسے کثیر فریقی ڈھانچوں کے تحت تعاون اور مشترکہ بحری اقدامات ہوں گے ۔
ہندوستان اور امریکہ کے درمیان باہمی اعتماد اور مشترکہ اقدار پر مبنی دیرینہ بحری شراکت داری ہے ۔ بحریہ کے سربراہ کا یہ دورہ ہندوستانی بحریہ کے ایک آزاد، کھلے ، جامع اور ضوابط پر مبنی ہند-بحرالکاہل خطے کے وژن کو پورا کرنے کے لیے امریکی بحریہ کے ساتھ تعاون کو مضبوط کرنے کے عزم کی نشاندہی کرتا ہے ۔
