فیروز پور- پٹی ریل لنک پروجیکٹ کو منظوری: بٹو

نئی دہلی، 12 نومبر (یو این آئی) ریلوے کے وزیر مملکت روونیت سنگھ بٹو نے کہا ہے کہ ریلوے کی وزارت نے فیروز پور-پٹی ریل لنک کے 25.72 کلومیٹر پروجیکٹ کو منظوری دے دی ہے ۔
مسٹر بٹو نے بدھ کو یہاں نامہ نگاروں کو بتایا کہ ان کی وزارت نے پنجاب حکومت کے چیف سکریٹری کو اس سیکشن پر ریلوے ٹریک کی تعمیر کے لیے اراضی کے حصول میں تیزی لانے کے لیے خط لکھا ہے ۔ اس پروجیکٹ پر 764.19 کروڑ روپے لاگت کا تخمینہ ہے جس میں سے 166 کروڑ روپے زمین کے حصول کے لیے مختص کیے گئے ہیں۔ اس ریلوے پروجیکٹ پر تعمیراتی کام سے 10 لاکھ افراد کو براہ راست اور بالواسطہ فائدہ پہنچے گا اور 2.5 لاکھ لوگوں کے لیے روزگار کے مواقع پیدا ہوں گے ۔
انہوں نے کہا کہ یہ پروجیکٹ اسٹریٹجک اور اقتصادی دونوں لحاظ سے انتہائی اہم ہے ۔ اس سے فیروز پور اور امرتسر کے درمیان فاصلہ 196 کلومیٹر سے کم ہو کر 100 کلومیٹر ہو جائے گا، جب کہ جموں-فیروز پور- فاضلکا-ممبئی کوریڈور کا فاصلہ 236 کلومیٹر کم ہو جائے گا۔ یہ پروجیکٹ مالوا اور ماجھا علاقوں کے درمیان ایک اہم رابطہ فراہم کرے گا، جس سے علاقائی رابطے اور لاجسٹک کارکردگی کو بہتری آئے گی۔
ریلوے کے وزیر مملکت نے کہا کہ یہ ریل لنک تجارت اور صنعتی ترقی کو تیز کرے گا، مال برداری کے اخراجات کو کم کرے گا اور زرعی منڈیوں تک رسائی کو آسان بنائے گا۔ اس سے تعلیم، صحت اور دیگر بنیادی ڈھانچے میں سرمایہ کاری کو بھی فروغ ملے گا۔ نئی ریل لائن امرتسر، جو ایک بڑا تجارتی، تعلیمی اور مذہبی مرکز ہے اور جہاں روزانہ ایک لاکھ سے زیادہ سیاح آتے ہیں، کو فیروز پور سے تیز اور مضبوط رابطہ فراہم کرے گی۔