آسام رائفلز ہاف میراتھن کا پانچواں ایڈیشن 14 دسمبر کو شیلانگ میں منعقد ہوگا

نئی دہلی، 08 نومبر (یو این آئی) آسام رائفلز ہاف میراتھن کا طویل انتظار کے بعد آنے والا پانچواں ایڈیشن اس سال 14 دسمبر کو میگھالیہ کے شیلانگ میں منعقد کیا جائے گا۔ اس بات کا اعلان منتظمین نے ہفتہ کے روز یہاں ایک پریس کانفرنس کے دوران کیا۔
ہندوستان کی سب سے قدیم نیم فوجی فورسز میں سے ایک، آسام رائفلز، جس کی بنیاد 1835 میں رکھی گئی تھی اور جو وزارت داخلہ کے ماتحت کام کرتی ہے، نے یہ میراتھن پہلی بار 2021 میں منعقد کی تھی۔ اس کا مقصد فٹنس، بھائی چارے اور عوامی شمولیت کو فروغ دینا تھا۔
پانچویں ایڈیشن میں 12 سال سے لے کر 60 سال سے زائد عمر کے 3000 سے زیادہ ایتھلیٹ تین مختلف فاصلوں — 5 کلومیٹر، 10 کلومیٹر اور 21 کلومیٹر — میں حصہ لیں گے۔ شرکاء نہ صرف اپر شیلانگ کے خوبصورت راستوں پر اپنی صلاحیتوں کا مظاہرہ کریں گے بلکہ 20 لاکھ روپے کی بھاری انعامی رقم کے لیے بھی مقابلہ کریں گے۔
منتظمین نے اس سال کی آسام رائفلز ہاف میراتھن کے لیے فِنِشر میڈل، سرمئی اور میرون رنگ کی جرسی اور دوڑ کے راستے کا بھی انکشاف کیا۔
اس موقع پر آسام رائفلز ہیڈکوارٹر کے نمائندہ کرنل نوجوت سنگھ (ایس ایم) نے کہا، “مجھے یہ اعلان کرتے ہوئے بے حد خوشی ہو رہی ہے کہ آسام رائفلز ہاف میراتھن کا پانچواں ایڈیشن اس سال 14 دسمبر کو اپر شیلانگ میں منعقد ہوگا۔ یہ تقریب تقریباً 3000 سے زائد شرکاء کے ساتھ شمال مشرقی خطے میں دوڑ کا سب سے زیادہ منتظر جشن بن چکی ہے۔ اسی کو مدنظر رکھتے ہوئے، ہم نے انعامی رقم کو بڑھا کر 20 لاکھ روپے کر دیا ہے۔ ہمارا مقصد نہ صرف فوجی اہلکاروں کے درمیان صحت اور بھائی چارے کو فروغ دینا ہے بلکہ عام شہریوں کو بھی وزیراعظم نریندر مودی کے صحت مند اور فٹ انڈیا مشن سے جڑنے کی ترغیب دینا ہے۔”
5 کلومیٹر کی دوڑ سب کے لیے کھلی ہے، جبکہ 10 کلومیٹر کی دوڑ میں چھ عمر کے زمروں (12-18، 18-30، 30-40، 40-50، 50-60 اور 60 سال سے زائد) کے افراد حصہ لے سکتے ہیں۔ پانچ عمر کے زمروں (18-30، 30-40، 40-50، 50-60 اور 60 سال سے زائد) کے دوڑنے والے ہاف میراتھن (21 کلومیٹر کی دوڑ) میں حصہ لے سکیں گے۔