آسٹریلیا میں چھوٹا طیارہ کریش

کینبرا، 11 اکتوبر (یو این آئی) آسٹریلیا کے نیو ساؤتھ ویلز میں شیل ہاربر ایئرپورٹ پر ایک لائٹ طیارہ اڑان بھرتے ہی کریش کرگیا، جس کے باعث 3 افراد لقمہ اجل بن گئے ۔
غیر ملکی ذرائع ابلاغ کے مطابق آسٹریلیا کے نیو ساؤتھ ویلز میں شیل ہاربر ایئرپورٹ سے طیارے نے صبح تقریباً 10 بجے اڑان بھری۔ یہ پرائیویٹ طیارہ تھا جس کی منزل باتھرسٹ تھی۔
رپورٹس کے مطابق اڑان کے صرف چند لمحے بعد، طیارہ تقریباً 30 میٹر کی بلندی پر پہنچ کر بائیں جانب جھک گیا اور زمین سے ٹکرا گیا اور آگ لگ گئی۔
ریسکیو حکام کے مطابق حادثے میں 3 افراد زندگی کی بازی ہار گئے جن کی شناخت ابھی تک واضح نہیں ہوسکی ہے ۔
ایک رپورٹ کے مطابق، ہلاک شدگان میں ایک جوڑا اور ایک 73 سالہ شہری شامل ہیں۔ دیگر رپورٹس کے مطابق ہلاک شدگان میں ایک بلڈر اینڈریو کونرز اور ان کی اہلیہ جولیئن شامل ہیں۔
نیوز ساؤتھ ویلز پولیس اور آسریلوی ٹرانسپورٹیشن سیفٹی بیورو نے حادثے کی وجہ جاننے کے لئے تفتیش شروع کردی ہے ۔
ابتدائی تجزیے کے مطابق، طیارہ زمین سے بہت زیادہ اوپر نہیں گیا تھا اور حادثے کا سبب کچھ تکنیکی خرابی یا کنٹرول کا مسئلہ ہو سکتا ہے ۔