کم جونگ اُن امریکہ کو نشانہ بنانے کی صلاحیت رکھنے والا جوہری ہتھیار منظر عام پر لے آئے

پیانگ یانگ، 11 اکتوبر (یو این آئی) شمالی کوریا کے سربراہ کم جونگ اُن غیر معمولی فوجی پریڈ کے دوران تباہ کن جوہری ہتھیار منظر عام پر لے آئے جس سے دنیا حیران رہ گئی۔
قطری نشریاتی ادارے الجزیرہ کی رپورٹ کے مطابق کم جونگ اُن نے بڑی فوجی پریڈ کی صدارت کی جس میں جدید ترین بین البراعظمی بیلسٹک میزائل کی نقاب کشائی کی۔
سرکاری میڈیا کے سی این اے کے مطابق جمعے کی رات منعقد ہونے والی اس پریڈ میں ورکرز پارٹی آف کوریا کے قیام کی 80ویں سالگرہ منائی گئی۔ فوجی پریڈ میں چینی وزیر اعظم لی کیانگ، سابق روسی صدر دمتری میدویدیف اور ویتنام کی کمیونسٹ پارٹی کے رہنما ٹو لام مہمان خصوصی تھے ۔
فوجی پریڈ کے دوران شمالی کوریا نے اپنا جدید ہاسونگ-20 بین البراعظمی بیلسٹک میزائل دنیا کے سامنے پیش کیا جسے ملک کا سب سے طاقتور ایٹمی اسٹریٹجک ہتھیار قرار دیا گیا۔
اگرچہ ہاسونگ آئی سی بی ایم سیریز شمالی کوریا کو امریکہ کے کسی بھی حصے پر حملہ کرنے کی صلاحیت فراہم کرتا ہے تاہم ماہرین اس کی درستگی اور وارہیڈ کے ماحول میں دوبارہ داخل ہونے کی صلاحیت کے بارے میں غیر یقینی ہیں۔
فوجی پریڈ کے دوران اپنے خطاب میں کم جونگ اُن نے غیر ملکی خدمات انجام دینے والے فوجیوں کی گرمجوشی سے حوصلہ افزائی کی اور کہا کہ ان کی بہادری قومی دفاع سے آگے سوشلسٹ تعمیر تک پھیلے گی۔
شمالی کوریا کے سربراہ نے مزید کہا کہ فوج کو ایک ناقابل تسخیر وجود میں ترقی کرتے رہنا چاہیے جو تمام خطرات کو تباہ کر دے ۔