جنوبی افریقہ کے خلاف سیریز میں اچھا آغاز کرنے کی امید :شان مسعود

کراچی، 11 اکتوبر (یواین آئی) پاکستان ٹیسٹ ٹیم کے کپتان شان مسعود نے کہا ہے کہ دفاعی چیمپئن جنوبی افریقہ کے خلاف کھیلنا ایک بہترین موقع ہے اور ٹیم اس سیریز میں مثبت آغاز کے لیے پُرعزم ہے۔ انہوں نے کہا کہ اگرچہ گزشتہ سیزن کے نتائج توقع کے مطابق نہیں رہے، مگر ٹیم نے ان تجربات سے بہت کچھ سیکھا ہے اور اب ہوم کنڈیشنز کا بھرپور فائدہ اٹھانے کی کوشش کی جائے گی۔
شان مسعود نے پریس کانفرنس میں کہا کہ "ہم نے بھرپور تیاری کی ہے، کوشش یہی ہے کہ سیریز کا آغاز کامیابی سے ہو۔ پچھلے سیزن میں نتائج مثالی نہیں تھے، مگر اس دوران بہت کچھ سیکھنے کو ملا۔”
انہوں نے کہا کہ ٹیسٹ کرکٹ جیتنے کے لیے 20 وکٹیں لینا بنیادی شرط ہے اور ہوم گراؤنڈ پر کھیلنے کا فائدہ ٹیم کو ضرور حاصل ہوگا۔ ان کے مطابق، اگر میچز میں چھ چھ سو رنز بنیں تو نتیجہ خیز مقابلہ ممکن نہیں رہتا، اس لیے باؤلرز کا کردار انتہائی اہم ہے۔
کپتان نے اسپنر ساجد خان کے حوالے سے بتایا کہ وہ ٹیم کے اہم باؤلر ہیں اور حالیہ وائرل انفیکشن سے صحتیاب ہو کر پریکٹس میں واپس آگئے ہیں۔ "ساجد نے آج بولنگ کی ہے، ان کی فارم بہتر لگ رہی ہے، ٹیم فائنل ہونے پر وہ اولین ترجیح ہوں گے۔”
شان مسعود نے کہا کہ ٹیم کے حتمی اسکواڈ میں 12 سے 13 کھلاڑی شامل ہیں، جبکہ ہوم کنڈیشنز میں کھیلنا ہمیشہ ایک بڑا فائدہ ہوتا ہے۔ "ہماری کوشش ہوگی کہ ہوم گراؤنڈ پر زیادہ سے زیادہ میچز جیت کر چیمپئن شپ میں اپنی پوزیشن مضبوط کریں۔”
دوسری جانب جنوبی افریقہ کے کپتان ایڈن مارکرم نے کہا کہ ایشیائی کنڈیشنز ہمیشہ چیلنجنگ ہوتی ہیں، تاہم ان کی ٹیم نے اسپنرز کے خلاف کھیلنے پر خاص توجہ دی ہے۔ انہوں نے کہا کہ "بابر اعظم ہمارے لیے ایک بڑی وکٹ ہوں گے، ہم جانتے ہیں کہ انہیں جلد آؤٹ کرنا کتنا ضروری ہے۔”