ہتاشی کی شاندار برتری، ٹاپ 10 میں پانچ ہندوستانی کھلاڑی

گُڑگاؤں، 11 اکتوبر (یو این آئی ) — ہندوستان کی ابھرتی ہوئی گولفر ہتاشی بخشی نے ہیرو ویمنز انڈین اوپن میں شاندار کھیل کا مظاہرہ کرتے ہوئے تین شاٹ کی برتری حاصل کرلی۔ نوجوان کھلاڑی نے 500,000 ڈالر انعامی رقم کے اس ایونٹ میں مسلسل تیسرا انڈر پار راؤنڈ کھیل کر سب کو متاثر کیا۔
ہتاشی نے اب تک 70، 67 اور 70 کا اسکور بنایا ہے، جس کے بعد 54 ہولز کے اختتام پر ان کا مجموعی اسکور 9 انڈر پار 207 ہے۔ 21 سالہ ہتاشی، جو پہلے کبھی کسی یورپی لیڈیز ٹور کے ایونٹ کے ٹاپ 10 میں شامل نہیں رہیں، اب تین بار کی انگلش چیمپئن ایلس ہیوسن (69-72-69) سے تین اسٹروک آگے ہیں، جن کا مجموعی اسکور 6 انڈر پار 210 ہے۔
ہندوستانی کھلاڑیوں نے لیڈر بورڈ پر اپنی بھرپور موجودگی درج کرائی۔ پرنوی اُرس (72-67-73) چار انڈر پار کے ساتھ تیسرے نمبر پر ہیں، جبکہ نوجوان کھلاڑی اَوَنی پرشانت (73-71-70) مشترکہ طور پر چوتھے مقام پر ہیں۔ اُن کے ساتھ مزید چار کھلاڑی شریک ہیں، جن میں زارا آنند بھی شامل ہیں، جنہوں نے ابتدائی چھ ہولز میں 4 اوور کھیلنے کے باوجود خود کو مقابلے میں برقرار رکھا۔
پرنوی اُرس، جو دوسرے راؤنڈ کے اختتام پر پانچ انڈر پار کے ساتھ چوتھے نمبر پر تھیں، نے تیسرے راؤنڈ میں 73 کا اسکور بنایا اور ایک قدم آگے بڑھتے ہوئے سنگل تیسرے مقام پر پہنچ گئیں۔
دوسری جانب، دوسرے دن 14ویں مقام پر رہنے والی اَوَنی پرشانت نے تیسرے راؤنڈ میں دو انڈر 70 کا متوازن کھیل پیش کیا۔ انہوں نے تین برڈیز اور ایک بوگی کھیلی اور اب وہ مجموعی طور پر چوتھے مقام پر ہیں۔
ہندوستانی گولفر میں مزید وانی کپور نے تیسرے راؤنڈ میں 74 کا اسکور بنا کر ایک انڈر 215 کے ساتھ مشترکہ طور پر نویں پوزیشن حاصل کی۔ 2022 کی مشترکہ رنر اپ امندِیپ درال نے 72 کا اسکور کرتے ہوئے 216 (ایون پار) کے ساتھ 12ویں مقام حاصل کیا۔
میچ کے بعد گفتگو کرتے ہوئے ہتاشی نے کہا:”یہ احساس بہت اچھا ہے۔ جیسا کہ میں ہمیشہ کہتی ہوں، زیادہ سوچنے کے بجائے ایک وقت میں ایک شاٹ کھیلنا بہتر ہوتا ہے۔ یہ میرا گھریلو کورس ہے، اس لیے کوئی دباؤ نہیں، بس کھیل سے لطف اٹھاتی ہوں۔”