سپریم کورٹ نے روسی خاتون کو ملک بدر کرنے کے فیصلے میں مداخلت سے انکار کیا

نئی دہلی، 6 اکتوبر (یواین آئی) سپریم کورٹ نے پیر کو ایک درخواست پر غور کرنے سے انکار کر دیا جس میں ایک روسی خاتون اور اس کی دو بیٹیوں کو ہندوستان میں بغیر درست دستاویزات کے ملک بدر کرنے کے فیصلے کو چیلنج کیا گیا تھا۔
جسٹس سوریہ کانت اور جویمالیا باگچی کی بنچ نے درخواست گزار اسرائیلی شہری ڈرور شلومو گولڈسٹین کو، جس نے دونوں بیٹیوں کا باپ ہونے کا دعویٰ کیا تھا، کو پھٹکار لگائی اور اس سے کئی سوالات پوچھے ۔
بنچ نے درخواست گزار کی نمائندگی کرنے والے وکیل سے بھی سوال کیا اور اسے "مفاد عامہ کی درخواست” قرار دیا۔
بنچ نے وکیل سے پوچھاکہ "براہ کرم ہمیں کوئی سرکاری دستاویز دکھائیں جس سے یہ ثابت ہو کہ آپ کو باپ قرار دیا گیا ہے ۔ ہم آپ کو ملک بدر کرنے کا حکم کیوں نہ دیں؟ جب آپ کے بچے غار میں رہ رہے تھے تو آپ گوا میں کیا کر رہے تھے ؟”
ان سوالات کے بعد وکیل نے کرناٹک ہائی کورٹ کے حکم کو چیلنج کرنے والی پٹیشن کو واپس لینے کا فیصلہ کیا جس میں روسی خاتون اور اس کی بیٹیوں کو ملک بدر کرنے کے مرکزی حکومت کے فیصلے کو برقرار رکھا گیا تھا۔
سپریم کورٹ نے ایک روسی خاتون اور اس کے بچوں کو ملک بدر کرنے کے فیصلے کو چیلنج کرنے والی درخواست پر غور کرنے سے انکار کر دیا، جو کرناٹک کے کورناک کے ایک غار میں بغیر کسی درست دستاویزات کے پائے گئے تھے ۔
روسی شہری نینا کوٹینا اور اس کی دو بیٹیاں 11 جولائی کو کونارک کے قریب رامتیرتھا پہاڑیوں کے ایک غار میں پائی گئیں۔ حکام نے دعویٰ کیا کہ تینوں افراد بغیر کسی درست دستاویزات کے تقریباً دو ماہ سے غار میں رہ رہے تھے ۔
دعویٰ کیا گیا کہ رقم ختم ہونے کے بعد خاتون اور اس کی دو بیٹیاں غار میں رہ رہی تھیں۔
درخواست گزار نے دعویٰ کیا کہ اس نے اپنے بچوں کے گم ہونے کے بعد گزشتہ سال گوا کے پنجی پولیس اسٹیشن میں شکایت درج کروائی تھی۔ اس کے بعد اس نے ہائی کورٹ سے رجوع کیا، جس نے خاتون اور اس کی بیٹیوں کو ملک بدر کرنے کے فیصلے میں مداخلت کرنے سے انکار کردیا۔
روسی قونصل خانے نے کوٹینا اور اس کی دو بیٹیوں کے لیے ہنگامی سفری دستاویزات جاری کی تھیں، کیونکہ اس نے جلد از جلد روس واپس جانے کی خواہش ظاہر کی تھی۔