این ڈی اے کی کمیٹی نے کرور میں بھگدڑ کی جگہ کا معائنہ کیا، اسپتال میں زخمیوں سے ملاقات کی

چنئی، 30 ستمبر (یو این آئی) اداکارہ اور متھرا سے رکن پارلیمنٹ ہیمامالنی کی قیادت میں قومی جمہوری اتحاد (این ڈی اے ) کی ایک کمیٹی نے منگل کے روز کرور جاکر بھگدڑ کی صورتحال کا جائزہ لیا اور متاثرین کے لواحقین سے ملاقات کی۔کمیٹی کو قومی کونسل کے رکن کے ۔ اناملائی، قانون ساز پارٹی کے رہنما نینار ناگندرن، بی جے پی نیشنل ویمنس فرنٹ کی سکریٹری وناتھی سری نواسن، ارکان اسمبلی اور بی جے پی کے سینئر لیڈروں نے تفصیل سے بتایا کہ یہ سانحہ کس طرح پیش آیا۔ بعد ازاں کمیٹی کے ارکان نے اسپتال کا دورہ کیا اور زخمیوں سے ملاقات کی۔ انہوں نے ڈاکٹروں سے بھی ملاقات کی اور علاج کے سلسلے میں گفتگو کی۔ بعد میں انہوں نے ہلاک شدگان کے اہل خانہ سے بھی ملاقات کی۔
بی جے پی کے قومی صدر جے پی نڈا نے اس بھگدڑ کے حالات کی جانچ کے لئے یہ کمیٹی تشکیل دی تھی جس میں این ڈی اے کی اتحادی جماعتوں کے اراکین شامل ہیں۔ کمیٹی کی صدر تمل ناڈو کی رہائشی ہیمامالنی ہیں اور مرکزی وزیر انوراگ ٹھاکر، تیجسوی سوریہ، سابق آئی پی ایس افسر برج لال، اپراجیتا سارنگی اور ریکھا شرما (سبھی بی جے پی سے ) شیو سینا کے شری کانت شنڈے اور ٹی ڈی پی کے پٹہ مہیش کمار اس کمیٹی کے رکن ہیں۔
کمیٹی دہلی پہنچنے کے بعد بی جے پی اعلیٰ قیادت کو ایک تفصیلی رپورٹ پیش کرے گی۔