کانگریس وفد کرور پہنچا، زخمیوں سے ملاقات کی

چنئی، 30 ستمبر (یو این آئی): کانگریس کے جنرل سکریٹری کے . سی. وینوگوپال کی قیادت میں ایک وفد نے منگل کے روز تمل ناڈو کے کرور کا دورہ کیا اور بھگدڑ میں جاں بحق ہونے والوں اور زخمیوں کے اہل خانہ سے ملاقات کر کے انہیں تسلی دی۔
ان کے ساتھ کانگریس کے تمل ناڈو انچارج گریش چوڈنکر، ریاستی یونٹ کے صدر سیلوپیرونتگئی کے ، کانگریس قانون ساز پارٹی کے رہنما راجیش کمار، کرور کی رکن پارلیمنٹ محترمہ جوتھی منی اور دیگر سینئر رہنما بھی موجود تھے ۔
کانگریس وفد نے کرور کے اس علاقے کا معائنہ کیا جہاں گزشتہ ہفتہ کی رات ایک سیاسی ریلی میں بھگدڑ کے باعث 41 افراد کچل کر ہلاک ہوگئے تھے ۔ اس ریلی کا انعقاد اداکار سے سیاستدان بنے تھلپتی وجے کی پارٹی ٹی وی کے نے کیا تھا۔
وفد نے جائے حادثہ پر سیکڑوں جوتے ، چپل اور بکھری ہوئی ذاتی اشیاء کا منظر دیکھا۔ انہوں نے پولیس اور سینئر حکام سے راحت اور بچاؤ کے کام، بھیڑ کے بڑھنے اور سیکورٹی کی کوتاہی جیسے معاملات کی جانکاری لی۔
بعد ازاں وفد اسپتال گیا، جہاں زخمیوں سے ملاقات کر کے ان کی خیریت دریافت کی اور ڈاکٹروں سے گفتگو کی۔ وفد نے مرنے والوں کے اہل خانہ سے بھی ملاقات کی اور انہیں تسلی دی۔ مسٹر وینوگوپال نے جوابدہی اور مستقبل میں اس طرح کے واقعات کو روکنے کے لیے بندوبست سے متعلق اصلاحات کی ضرورت پر بھی زور دیا۔
قابل ذکر ہے کہ مسٹر وجے کی اس ریلی میں بھگدڑ میں 41 افراد کی جان چلی گئی تھی، جن میں 18 خواتین، 13 مرد اور 10 بچے (پانچ لڑکیاں اور پانچ لڑکے ) شامل تھے ۔