گجرات کے گورنر دیوورت کا اڈانی ودیا مندر میں طلبہ سے خطاب

احمد آباد، 29 ستمبر (یو این آئی) گجرات کے گورنر آچاریہ دیوورت پیر کے روز احمد آباد میں اڈانی فاؤنڈیشن کے زیر انتظام اڈانی ودیا مندر میں منعقدہ ایک خصوصی پروگرام میں شریک ہوئے اور طلبہ سے گفتگو کی۔
گورنر دیوورت نے طلبہ سے خطاب کرتے ہوئے کہا کہ جو بچے کم عمری سے ہی محنت کرتے ہیں، وہ زندگی میں ضرور کامیاب ہوتے ہیں۔ انہوں نے ڈاکٹر اے پی جے عبدالکلام، امریکہ کے سابق صدر ابراہم لنکن اور وزیراعظم نریندر مودی کی مثال دیتے ہوئے کہا کہ ان کی زندگی بچپن سے ہی محنت اور جدوجہد سے بھری ہوئی تھی اور یہی وجہ ہے کہ وہ عظیم شخصیات بنیں۔ انہوں نے مزید کہا کہ آج وزیراعظم نریندر مودی نے دنیا کے کئی ممالک میں عزت و مقام حاصل کر کے ہندوستان کا نام روشن کیا ہے ، جو ان کی محنت و عزم کی زندہ مثال ہے ۔ انہوں نے طلبہ کو نصیحت کرتے ہوئے کہا کہ اگر کسی کام کے سلسلے میں ڈر یا شکوک ہوں تو وہ کام نہیں کرنا چاہئے اور اگر کوئی غلطی ہو جائے تو اسے چھپانے کے بجائے والدین، اساتذہ یا بزرگوں کو بتانا چاہئے ۔
اس موقع پر گورنر نے طلبہ کو جنک فوڈ سے پرہیز، گھریلو سادہ کھانے کے استعمال اور نشے سے دور رہنے کی اپیل کی۔ ساتھ ہی انہوں نے طلبہ کو گُروکل کی تعلیمی روایت سے بھی آگاہ کیا۔ پروگرام کے دوران انہوں نے اڈانی فاؤنڈیشن کے زیر انتظام اڈانی ودیا مندر کے کیمپس کا دورہ بھی کیا۔ اس موقع پر اڈانی فاؤنڈیشن کی چیئرپرسن ڈاکٹر پریتی اڈانی، ایگزیکٹیو ڈائریکٹر وسنت گڑھوی، ٹرسٹی شیلن اڈانی، اسکول کی پرنسپل ڈاکٹر شلپا اندوریا کے ساتھ اڈانی فاؤنڈیشن کے عہدیداران، اساتذہ اور بڑی تعداد میں طلبہ موجود تھے ۔