وائٹ ہاؤس کے صدارتی واک آف فیم میں بائیڈن کے پورٹریٹ کی جگہ ‘آٹومیٹک پین’ کی تصویر لگائی گئی

واشنگٹن، 25 ستمبر (یواین آئی) امریکی صدر ڈونلڈ ٹرمپ نے بدھ کو وائٹ ہاؤس میں ایک نئی "صدارتی واک آف فیم” گیلری کی نقاب کشائی کی۔ اس میں اب تک کے تمام امریکی صدور کی تصاویر موجود ہیں لیکن سابق صدر جو بائیڈن کی تصویر غائب ہے ۔
ویسٹ ونگ کالونیڈ میں ایک دیوار پر سونے کے فریموں میں آویزاں، یہ تصاویر پہلے صدر جارج واشنگٹن سے شروع ہوتی ہیں اور موجودہ صدر مسٹر ٹرمپ تک جاری رہتی ہیں۔ تاہم، مسٹرٹرمپ کے فوری پیشرو مسٹر بائیڈن کی تصویرنظر نہیں آرہی ہے ۔ اس کے بجائے ، اس جگہ پر دستخط کرتے ہوئے ‘آٹومیٹک پین’ کی تصویر لگا دی گئی ہے ۔
یہ بات قابل ذکر ہے کہ مسٹر بائیڈن کے ناقدین کا الزام ہے کہ انہوں نے ذاتی طور پر حکومت نہیں چلائی اور امریکہ کا انچارج کوئی اور تھا۔ مزید دعویٰ کیا گیا ہے کہ مسٹر بائیڈن نے صرف دستخط کیے تھے ۔ مسٹر بائیڈن نے گزشتہ صدارتی انتخابات میں مسٹر ٹرمپ کو شکست دی تھی لیکن اس بار مسٹر ٹرمپ نے واپسی کی لیکن اس بار ان کا سامنا مسٹر بائیڈن سے نہیں بلکہ ہندوستانی نژاد کملا ہیرس سے ہوا، جو ڈیموکریٹک صدارتی امیدوار ہیں۔
اس مہینے کے شروع میں مسٹر ٹرمپ نے نامہ نگاروں کو بتایاکہ "میرے خیال میں انہوں نے صرف ایک دستاویز پر دستخط کیے ، یا ان چند دستاویزات میں سے ایک جن پر انھوں نے دستخط کیے ، اپنے بیٹے کے لیے معافی تھی۔” انہوں نے اس بات کا اعادہ کیا کہ آٹوپین کو "غیر قانونی طور پر استعمال کیا گیا تھا۔”
مسٹر ٹرمپ نے اپنے پیشرو کے دور میں ملک چلانے والوں کے خلاف دھوکہ دہی کے الزامات کی تحقیقات کا حکم دیا ہے ۔
مسٹر بائیڈن نے بارہا ایسے دعووں کی تردید کرتے ہوئے کہا ہے کہ تمام فیصلے ان کے اپنے تھے اور آٹوپین کے استعمال کی مکمل اجازت تھی۔ امریکی قانون کے تحت، اس ڈیوائس کے ساتھ دستخط شدہ دستاویزات کی وہی قانونی قدر ہوتی ہے جو صدر کی طرف سے منظور ہونے پر ہاتھ سے لکھے ہوئے دستخطوں کی ہوتی ہے ۔
واضح رہے کہ اس "واک آف فیم” گیلری کی تعمیر وائٹ ہاؤس کی ایک جامع تزئین و آرائش کا حصہ ہے ، جس میں اوول آفس میں سونے کی پرت چڑھانا، روز گارڈن میں فلوریڈا کی ان کی اسٹیٹ کے مطابق بنایا گیا سنگ مرمر کا صحن، ایک نیا بال روم اور وائٹ ہاؤس کے لان پر دو 27 میٹر اونچے فلیگ پولز کی تنصیب شامل ہے ۔