لیزا کیٹلی ممبئی انڈینز کی خواتین ٹیم کی ہیڈ کوچ مقرر

ممبئی، 25 ستمبر (یو این آئی) ممبئی انڈینز نے آج سابق آسٹریلیائی کرکٹر اور دو بار ورلڈ کپ جیتنے والی لیزا کیٹلی کو اپنی خواتین ٹیم کا ہیڈ کوچ مقرر کیا ہے اس موقع پر اظہار مسرت کرتے ہوئے نیتا ایم امبانی نے کہا ہمیں ممبئی انڈینز فیملی میں لیزا کیٹلی کا خیرمقدم کرتے ہوئے خوشی محسوس ہورہی ہے لیزا نے اپنے شوق سے کرکٹ کے شائقین کو متاثر کیا ہے ان کی آمد ممبئی انڈینز کے لیے ایک دلچسپ نئے باب کی نشاندہی کرتی ہے کیوں کہ ہم بلند پروازکی تیاری کر رہے ہیں۔”
لیزا کیٹلی نے کہا، ممبئی انڈینز میں شامل ہونا ایک اعزاز کی بات ہے، ایک ایسی ٹیم جس نے ڈبلیو پی ایل میں بہت سے معیارات قائم کیے ہیں۔ میں اپنی کامیابی کو آگے بڑھانے اور میدان کے اندر اور باہرکھلاڑیوں کی حوصلہ افزائی کرنے کے لیے ٹیم کے ساتھ کام کرنے کے لیے پر جوش ہوں۔”
کیٹلی آسٹریلیا اور انگلینڈ دونوں خواتین ٹیموں کی کوچنگ کر چکی ہیں۔ وہ انگلینڈ کی کل وقتی ہیڈ کوچ بننے والی پہلی خاتون تھیں۔ ان کے پاس ڈبلیو بی بی ایل، دی ہنڈرڈ اور ڈبلیو پی ایلمیں فرنچائز کوچنگ کا تجربہ بھی ہے اور حال ہی میں گزشتہ ماہ دی ہنڈرڈ میں ناردرن سپرچارجرز کو خواتین کے ٹائٹل تک پہنچایا۔ کیٹلی کو ایک اسٹائلش اوپننگ بلے باز کے طور پر جانا جاتا ہے۔ انہوں نے 9 ٹیسٹ، 82 ون ڈے اور ایک ٹی ٹوئنٹی انٹرنیشنل میں آسٹریلیا کی نمائندگی کی ہے۔
کیٹلی جو 1997 اور 2005 میں آسٹریلیا کی ورلڈ کپ جیتنے والی ٹیموں کا حصہ تھیں، خواتین کی کرکٹ میں سب سے معزز کوچز میں سے ایک ہیں۔ آسٹریلیا، انگلینڈ اور ٹاپ عالمی لیگز میں اپنے شاندار کھیل کے کیریئر اور کوچنگ کے تجربے کے ساتھ وہ ممبئی انڈینز ٹیم کے لیے بے مثال تجربہ اور وژن لائیں گی۔ ممبئی انڈینز کی خواتین ٹیم پہلے ہی ڈبلیو پی ایل کی تاریخ کی سب سے کامیاب ٹیم ہے، جس نے صرف تین سیزن میں دو چیمپئن شپ جیتی ہیں۔ وہ 2023 اور 2025 میں ڈبلیو پی ایل کی چیمپئن ہیں۔