آر اشون سڈنی تھنڈر کے ساتھ جڑیں گے

نئی دہلی، 25 ستمبر (یو این آئی) ہندوستان کے آف اسپنر آر اشون نے آنے والے بگ بیش لیگ (بی بی ایل) سیزن کے لیے سڈنی تھنڈر کے ساتھ معاہدہ کیا ہے۔ اس تاریخی قدم کے ساتھ وہ اس ٹورنامنٹ میں کھیلنے والے پہلےہندوستانی کھلاڑی بن جائیں گے۔ ڈبلیو بی بی ایل میں ہندوستان کی کئی خواتین کھلاڑی حصہ لے چکی ہیں، لیکن بی سی سی آئی کے ضابطے کی وجہ سے ہندوستانی مرد کھلاڑی عالمی لیگز میں حصہ نہیں لے سکتے۔ ہندوستان کے سابق انڈر-19 کپتان انمکت چند اور سابق گھریلو کھلاڑی نکھل چودھری نے حالیہ برسوں میں بگ بیش لیگ (بی بی ایل) میں حصہ لیا ہے، لیکن چند امریکہ کے شہری ہیں جبکہ چودھری اب آسٹریلیا میں مقامی کھلاڑی کے طور پر کھیلتے ہیں اور انہوں نے اسی مہینے تسمانیہ کے لیے لسٹ اے میں ڈیبیو کیا ہے۔
اس سال کے آغاز میں آئی پی ایل سے ریٹائرمنٹ لینے کے بعد اشون کے لیے غیر ملکی لیگز میں کھیلنا ممکن ہو گیا ہے۔
اشون نے تھنڈر سے جڑنے کے سلسلے میں کہا کہ تھنڈر اس بات پر بالکل واضح تھے کہ وہ میرا استعمال کیسے کریں گے ۔ مجھے ڈیوڈ وارنر کا کھیلنے کا انداز بہت پسند ہے، اور یہ ہمیشہ بہتر ہوتا ہے جب آپ کا لیڈر آپ کی سوچ سے متفق ہو۔
اشون تھنڈر کی جانب سے معاہدہ کیے گئے 17ویں کھلاڑی ہیں۔ لیگ کے ضابطے کے مطابق ہر کلب اپنی ٹیم میں زیادہ سے زیادہ 18 کھلاڑی رکھ سکتا ہے۔