پاکستان نے سری لنکائی بلے باز کو ناپسندیدہ ریکارڈ تھما دیا

پاکستان کے خلاف ایشیا کپ 2025 کے سُپر فور مرحلے کے میچ میں سری لنکا کے آل راؤنڈر داسن شناکا نے ٹی ٹوئنٹی انٹرنیشنل کرکٹ میں سب سے زیادہ صفر پر آؤٹ ہونے کا ناپسندیدہ ریکارڈ اپنے نام کرلیا۔
پاکستان کے خلاف ابو ظہبی میں ایشیا کپ سپر فور مرحلے کے میچ میں سری لنکنائی کھلاڑی داسن شناکا صفر پر آؤٹ ہوئے اور اس طرح انہوں نے ٹی ٹوئنٹی انٹرنیشنل کرکٹ میں سب سے زیادہ مرتبہ صفر پر آؤٹ ہونے کا شرمناک ریکارڈ بھی اپنے نام کرلیا۔ داسن شناکا جب بیٹنگ کے لیے آئے تو وہ صرف ایک ہی گیند کے مہمان ثابت ہوئے، انہیں حسین طلعت نے پہلی ہی گیند پر آؤٹ کر کے واپس پویلین بھیج دیا۔
یوں داسن شناکا ٹی ٹوئنٹی انٹرنیشنل میں 14 مرتبہ صفر پر آؤٹ ہونے والے پہلے کھلاڑی بن گئے۔
اس فہرست میں داسن شناکا کے بعد 13 مرتبہ صفر کے ساتھ روانڈا کے مارٹن اکائیزو، بنگلہ دیش کے سومیہ سرکار اور آئرلینڈ کے اوپنر پال اسٹرلنگ کا نام شامل ہے۔
یاد رہے کہ گزشتہ روز ایشیا کپ ٹی ٹوئنٹی ٹورنامنٹ کے سُپر 4 مرحلے میں پاکستان نے سری لنکا کو 5 وکٹوں سے شکست دی تھی۔ پاکستان ٹیم نے سری لنکا کا 134 رنز کا ہدف 18ویں اوور میں 5 وکٹوں کے نقصان پر حاصل کیا تھا۔