چین اور روس نے قانون سازی میں تعاون کو مضبوط بنانے کا کیا عہد

ماسکو، 20 ستمبر (یو این آئی) چین اور روس نے منگل سے ہفتہ تک چینی وفد کے دورہ روس کے دوران اپنے قانون ساز اداروں کے درمیان تعاون کو مضبوط بنانے کا عہد کیا۔
دورے کے دوران وفد کی قیادت کر رہے چین کی قومی عوامی کانگریس کی قائمہ کمیٹی کے وائس چیئرمین پینگ چنگہوا نے روس کے ریاستی ڈیوما کے چیئرمین ویاچیسلاو وولودن، جمہوریہ تاتارستان کے سربراہ رستم منیخانوف اور تاتارستان کی ریاستی کونسل کے چیئرمین فرید مخمیتشین سے ملاقات کی۔
مسٹر پینگ نے روسی ریاست ڈوما کے ڈپٹی چیئرمین الیگزینڈر باباکوف کے ساتھ پارلیمانی تعاون پر چین-روس کمیٹی کے مشترکہ ورکنگ گروپ کے چوتھے اجلاس کی بھی شریک صدارت کی۔
مسٹر پینگ نے کہا کہ دونوں سربراہان مملکت کی اسٹریٹجک رہنمائی میں چین اور روس کے تعلقات تاریخ کی اپنی بہترین سطح پر ہیں۔
مسٹر پینگ نے مزید کہا کہ چین، دونوں سربراہان مملکت کی طرف سے طے پانے والے اتفاق رائے کو بنیادی رہنما اصول کے طور پر لیتے ہوئے ، مشترکہ ورکنگ گروپ کے رول کو مزید فائدہ پہنچانے ، قانون ساز اداروں کے درمیان تعاون کو مسلسل بڑھانے اور چین روس تعلقات کی اعلیٰ معیار کی ترقی میں تعاون دینے کے لیے روس کے ساتھ کام کرنے کے لیے تیار ہے ۔
روسی فریق نے چین کے ساتھ اسٹریٹجک تعاون کو مزید گہرا کرنے ، تمام سطحوں پر پارلیمانوں کے درمیان تبادلوں اور تعاون کو مسلسل مضبوط بنانے اور روس- چین تعلقات کے مفہوم کو مسلسل تقویت دینے پر آمادگی ظاہر کی۔