ایس اے آئی سونی پت ٹاپ پوزیشن پر

جالندھر، 18 ستمبر (یو این آئی) نیول ٹاٹا ہاکی اکیڈمی جمشید پور نے پنجاب ہاکی لیگ (انڈر 21) کے دوسرے ایڈیشن کے 10 ویں دن ٹیبل ٹاپرز راؤنڈ گلاس ہاکی اکیڈمی کو 5-3 سے شکست دے دی۔ یہ میچ آج اولمپیئن سرجیت سنگھ ہاکی سٹیڈیم میں کھیلا گیا۔ آر جی ایچ اے کی شکست کے بعد اسپورٹس اتھارٹی آف انڈیا نیشنل سینٹر آف ایکسی لینس سونی پت نے پی آئی ایس سرجیت ہاکی اکیڈمی کو 4-3 سے ہرا کر 10 میچوں میں 27 پوائنٹس کے ساتھ ٹیبل میں سرفہرست مقام حاصل کیا۔ آر جی ایچ اے کے اتنے ہی میچوں سے 26 پوائنٹس ہیں، جبکہ نیول ٹاٹا 17 پوائنٹس کے ساتھ تیسرے نمبر پر چلا گیا ہے۔
آر جی ایچ اے نے 16ویں منٹ میں سکھپریت سنگھ کے گول سے برتری حاصل کی۔ اس کے بعد نیول ٹاٹا نے 19 منٹ کے وقفے میں پانچ گول کر کے میزبانوں کو حیران کر دیا۔ سبین کیرو نے دو گول کیے، جبکہ گنگا ٹوپنو، موہت نائک، اور آشیش تانی پورتی نے فاتح ٹیم کے لیے دیگر گول کیے آر جی ایچ اے نے آخری کوارٹر میں جپنیت سنگھ اور انوراگ کے ذریعے دو گول کے ساتھ واپسی کی کوشش کی، لیکن وہ صرف فرق کو کم کر سکا۔