ایشیا کپ پر چھائے بے یقینی کے بادل چھٹ گئے

دبئی،17 ستمبر(یو این آئی )ایشیا کپ پر چھائے بے یقینی کے بادل چھٹ گئے پاکستان ٹیم میچ کے لیے اسٹیڈیم روانہ ہو گئی۔
ایشیا کپ 2025 کا دسواں میچ آج پاکستان اور یو اے ای کے درمیان ہونا ہے۔ذرائع کے مطابق میچ ریفری کے اینڈی پائکرافٹ کے تنازع پر جاری ڈیڈ لاک ختم ہونے کے بعد پاکستانی ٹیم ہوٹل سے اسٹیڈیم کے لیے روانہ ہو گئی ہے۔ میچ مقررہ وقت سے ایک گھنٹہ تاخیر سے شروع ہوگا۔
ہند۔پاک میچ میں ہاتھ ملانے کے تنازع اور میچ ریفری اینڈی کرافٹ کے رویہ پر پاکستان کرکٹ بورڈ نے موقف اپناتے ہوئے زمبابوے سے تعلق رکھنے والے میچ ریفری اینڈی کرافٹ کو ایشیا کپ سے ہٹانے کا مطالبہ کیا تھا اور اس حوالے سے آئی سی سی کو دو بار خطوط بھی لکھے گئے تھے۔
آئی سی سی نے اینڈی کرافٹ کو ٹورنامنٹ سے ہٹانے کا مطالبہ مسترد کر دیا تھا۔ بعد ازاں متنازع میچ ریفری کو پاکستان کے میچ سے ہٹانے اور اس کی جگہ رچی رچرڈ سن کو میچ ریفری مقرر کرنے کی پیشکش کی تھی۔
تاہم ڈیڈ لاک برقرار رہنے پر آج دبئی میں آئی سی سی، ایشین کرکٹ کونسل اور پی سی بی حکام کا اجلاس ہوا۔ اس اجلاس میں ایمریٹس کرکٹ بورڈ کے حکام نے بھی شرکت کی۔ تاہم پاکستان کے مطالبہ پر کوئی حتمی فیصلہ نہ ہوسکا اور اجلاس ختم کر دیا گیا۔
اس کے بعد پی سی بی نے پاکستانی کھلاڑیوں کو گراؤنڈ روانہ ہونے سے روک دیا اور ٹیم کو واپس اپنے کمروں میں جانے کی ہدایت کی۔
پل پل بدلتی صورتحال میں پی سی بی کے ترجمان عامر میر نے آکر میڈیا سے مختصر گفتگو میں بتایا کہ پاکستان اور یو اے ای کا میچ ایک گھنٹہ کے لیے موخر کیا گیا ہے۔ چیئرمین پی سی بی محسن نقوی سابق چیئرمین نجم سیٹھی، رمیز راجا سے اس تنازع سے متعلق مشاورت کر رہے ہیں۔ دوسری جانب آئی سی سی کا بھی ہنگامی اجلاس دوبارہ شروع ہوا۔
اس کے بعد یہ بڑی پیش رفت ہوئی کہ میچ ریفری اینڈی پائکرافٹ جو اسٹیڈیم آ چکے تھے، وہ وہاں سے چلے گئے اور آئی سی سی ہیڈ کوارٹر پہنچ گئے۔ چیئرمین پی سی بی نے پاکستانی ٹیم کو گراؤنڈ روانہ ہونے کے لیے گرین سگنل دیا۔
بعد ازاں میڈیا کو بتایا گیا کہ پاکستانی ٹیم کے کھلاڑیوں کو اسٹیڈیم روانہ ہونے کا حکم دے دیا گیا ہے اور ٹیم میچ کھیلنے کے لیے روانہ ہو گئی ہے۔ میچ اب پاکستانی وقت کے مطابق رات ساڑھے 8 بجے شروع ہوگا۔