وزیر اعظم نے پورنیہ ہوائی اڈے کی نئی ٹرمینل عمارت کا افتتاح کیا

پورنیا، 15 ستمبر (یواین آئی) وزیر اعظم نریندر مودی نے پیر کے روز بہار کے پورنیہ ضلع میں علاقائی رابطوں کو فروغ دینے کے لیے نو تعمیرہوائی اڈے کی ٹرمینل عمارت کا افتتاح کیا۔
یہ ٹرمینل عمارت نہ صرف سیمانچل اور کوسی خطہ کے لوگوں کے لیے ہوائی سفر کی نئی سہولیات لائے گی بلکہ علاقائی رابطوں اور بہار کی اقتصادی ترقی کو بھی نئی اڑان دے گی۔
مسٹر مودی کی موجودگی میں ایک 76 سیٹوں والے طیارے نے احمد آباد کے لیے اڑان بھری اور پھر ایک اور طیارے نے کولکاتہ کیلئے بھی اڑان بھری۔
اس کے ساتھ ہی وزیر اعظم نے گزشتہ لوک سبھا انتخابات کے دوران پورنیہ کے لوگوں سے نیا ہوائی اڈہ ٹرمینل بنانے کا اپنا وعدہ پورا کیا ہے ۔
وزیر اعظم مودی نے علاقائی رابطہ اسکیم ‘اڑان’ کے تحت ملک کے چھوٹے شہروں کو فضائی نیٹ ورک سے جوڑنے کا ہدف مقرر کیا ہے ۔ پورنیہ ہوائی اڈے کے ٹرمینل کا افتتاح اس سمت میں ایک اہم قدم ہے ۔ بہتر فضائی رابطہ بہار کے سیمانچل اور کوسی خطے کے سماجی و اقتصادی منظر نامے کو بدل دے گا۔ پورنیہ ہوائی اڈے کی نئی ٹرمینل عمارت نہ صرف سیمانچل خطے کی دہائیوں پرانی مانگ کو پورا کرے گی بلکہ بہار کے فضائی رابطہ کو بھی ایک نئی بلندی دے گی۔ اس سے جہاں مقامی لوگوں کی سہولت میں اضافہ ہوگا، وہیں اس سے ریاست کی ترقی اور روزگار کے مواقع پیدا کرنے کو بھی ایک نئی تحریک ملے گی۔
اس فضائی سروس سے پورنیہ ڈویژن سمیت تقریباً ایک درجن اضلاع کو فائدہ پہنچے گا۔ پٹنہ، گیا، دربھنگہ کے بعد پورنیہ اب بہار کا چوتھا ہوائی اڈہ ہے جہاں سے کمرشیل فلائٹ سروس شروع ہوئی ہے ۔ انڈیگو ایئر لائنز احمد آباد اور پورنیہ کے درمیان ہفتے میں تین دن پرواز کرے گی، جس سے گجرات کے بڑے صنعتی شہر سے براہ راست جڑنے کا موقع ملے گا۔ پورنیہ مشرقی بہار کا سب سے اہم شہر ہے اور اس کا اپنے آس پاس کے شہروں سہرسہ، مدھے پورہ، سپول، ارریہ، کٹیہار، بھاگلپور، نوگچھیا، فاربس گنج کے ساتھ ساتھ نیپال اور بنگال کے بہت سے شہروں سے رابطہ ہے ۔
پورنیہ ہوائی اڈے کی نئی تعمیر شدہ عبوری ٹرمینل عمارت کے آغاز سے اس خطے میں فضائی خدمات کو وسعت ملے گی۔ یہ ٹرمینل جدید سہولیات سے آراستہ ہے اور اس کی نئی عمارت کی تعمیر کے بعد مسافروں کو سنبھالنے کی صلاحیت میں نمایاں اضافہ ہونے کا امکان ہے ۔ اب پروازیں شروع ہونے اور ان کی تعداد میں اضافے سے مسافروں کو دہلی، پٹنہ اور دیگر بڑے شہروں کے لیے براہ راست اور باقاعدہ ہوائی خدمات ملنا شروع ہو جائیں گی۔ پورنیہ، کٹیہار، ارریہ، کشن گنج، سپول اور سہرسہ جیسے اضلاع کے لوگ اب اپنے قریبی شہر سے فضائی خدمات حاصل کر سکیں گے ۔ اب تک اس علاقے کے مسافروں کو پٹنہ یا باگڈوگرا جانا پڑتا تھا لیکن اس ٹرمینل کے شروع ہونے سے مسافروں کا وقت اور خرچ دونوں کی بچت ہوگی۔
پورنیہ اور آس پاس کا علاقہ کاروبار، تعلیم اور زراعت کے نقطہ نظر سے اہم سمجھا جاتا ہے ۔ فضائی رابطے میں اضافے سے یہاں سرمایہ کاری، صنعت اور سیاحت کو فروغ ملے گا۔ اس کے ساتھ یہاں کے طلبائاور کاروباری افراد کو بھی قومی اور بین الاقوامی سطح پر بہتر مواقع میسر آئیں گے ۔