کانگریس نے اگنی پتھ اسکیم پر منیش تیواری کے بیان کو ذاتی رائے قرار دیا

نئی دہلی// اگنی پتھ کو قومی مفاد کے خلاف بتانے والی کانگریس پارٹی کے رکن پارلیمنٹ منیش تیواری نے اس اسکیم کو دفاعی اصلاحات کی سمت میں ایک بڑا قدم قرار دیا توکانگریس نے خود کو ان کے بیان سے الگ کرکے اسے مسٹر تیواری کا ذاتی خیال قرار دیا ہے۔
کانگریس جنرل سکریٹری جے رام رمیش نے ٹویٹ کیا، "کانگریس کے رکن پارلیمنٹ منیش تیواری نے اگنی پتھ پر ایک مضمون لکھا ہے۔ کانگریس ایک جمہوری پارٹی ہے لیکن یہاں یہ بتانا ضروری ہے کہ یہ ان کے ذاتی خیالات ہیں پارٹی کے نہیں۔ پارٹی کو پختہ یقین ہے کہ اگنی پتھ قومی سلامتی اور نوجوانوں کے خلاف ہے۔ یہ منصوبہ ایک بلڈوزر کی طرح ہے جو بغیر سوچے سمجھے عمل میں لایا گیا۔
واضح رہے کہ مسٹر تیواری نے اس سلسلے میں ایک انگریزی روزنامے میں ایک مضمون لکھا ہے جس میں انہوں نے کہا کہ اگنی پتھ دفاعی اصلاحات اور فوج کو جدید بنانے کی سمت میں ایک بڑا قدم ہے۔ کانگریس شروع سے ہی اس منصوبہ کی مخالفت کرتی رہی ہے اور اس کا کہنا ہے کہ اس سے ملک کی سلامتی خطرے میں پڑ جائے گی اور نوجوانوں کا مستقبل تباہ ہو جائے گا۔ اس منصوبے کے خلاف پورے ملک میں زبردست ہنگامہ ہوا۔