فرانس میں بیوروکریسی اور سیاسی نظام کے خلاف ملک گیر ہڑتال کی کال

پیرس، 8 ستمبر(یو این آئی) معاشی اور سیاسی نظام کے خلاف فرانس میں 10 ستمبر کو ملک گیر ہڑتال کی کال دی گئی ہے ۔
خبر رساں ایجنسی کے مطابق فرانس میں بیوروکریسی اور سیاسی نظام پر عوامی عدم اعتماد اور معاشی ناانصافی کے علاوہ بجٹ کٹوتیوں کے خلاف دس ستمبر کو ملک گیر ہڑتال کی جائے گی۔
رپورٹ کے مطابق سب کچھ روک دو تحریک کے سپورٹرز اس ہڑتال کی بھرپور تیاری کر رہے ہیں، یہ تحریک فرانسیسی وزیرِ اعظم بائیرو کی بجٹ کٹوتیوں کی مخالف ہے ۔
رپورٹ میں کہا گیا ہے کہ اکثر جماعتیں اور لوگ صدر میکرون کی برطرفی یا مستعفی ہونے اور ایک نئے جمہوری نظام چاہتے ہیں، دیگر مطالبات میں معاشرتی انصاف، بہتر اجرتیں، ریٹائرمنٹ کی عمر پر دوبارہ غور، زک مین ٹیکس کے نفاذ، یورپی یونین سے اخراج، سیاسی دھڑے بازی کے خاتمے جیسے مطالبات شامل ہیں۔
تحریک نے جو مزاحمتی اقدامات شامل کیے ہیں ان میں راؤنڈ اباؤٹ یا اہم سڑکوں، یونیورسٹیز، ریفائنریز، ایئر پورٹس، ریل کے راستوں، ایمیزون مراکز وغیرہ کو بلاکس کرنا اور قبضے میں لینا شامل ہے ۔