جموںکشمیر بینک کی یو ٹی انتظامیہ کو ۱۳۱ کروڑ روپے کی ڈیونڈ چکیں پیش

حصص یافتگان کو ڈیوڈنڈ کی ادائیگی کا آغاز کرتے ہوئے، جے اینڈ کے بینک کے منیجنگ ڈائریکٹر اور سی ای او شری امیتاوا چیٹرجی نے آج مالی سال۲۰۲۵۔۲۰۲۴ کیلئے یو ٹی انتظامیہ ‘ جو بینک کا پروموٹر اور بڑا شیئر ہولڈر ہے ‘ کو بالترتیب۸۵ء۱۲۲ کروڑ روپے اور۹۲ء۷ کروڑ روپے کے دو ڈیوڈنڈ چیکس پیش کیے۔
ڈیوڈنڈ چیکس راج بھون میں لیفٹیننٹ گورنر شری منوج سنہا کو پیش کیے گئے۔
اس موقع پر چیف سکریٹری شری اٹل دولّو، پرنسپل سکریٹری فنانس شری سنتوش ڈی ویدیا، پرنسپل سکریٹری ٹو لیفٹیننٹ گورنر ڈاکٹر مندیپ کے بھنڈاری، اور شری محمد شفی میر، کمپنی سکریٹری جے اینڈ کے بینک بھی موجود تھے۔
ڈیوڈنڈ کی یہ ادائیگی، جو بینک کی۸۷ویں سالانہ عام میٹنگ (اے جی ایم) میں۲۱۵ فیصد ڈیوڈنڈ کی منظوری کے بعد کی گئی، بینک کی مالی مضبوطی اور خطے کی معاشی ترقی میں اس کے اہم کردار کو اجاگر کرتی ہے۔
لیفٹیننٹ گورنر نے جموں کشمیر بینک کی پوری ٹیم کو مبارکباد دی اور زور دیا کہ بینک خاطر خواہ اور پائیدار ترقی کو جاری رکھے اور عوام کو بہترین خدمات فراہم کرے۔
لیفٹیننٹ گورنر نے کہا کہ جے اینڈ کے بینک کو مالی شمولیت پر اپنی توجہ برقرار رکھنی چاہیے، لوگوں کو جوڑنا چاہیے اور چھوٹے و مائیکرو انٹرپرائزز کو مینوفیکچرنگ اور سروسز کے لیے فروغ دینا چاہیے۔
سنہا نے مزید کہا کہ ۲۰۱۹ کے بعد جے اینڈ کے بینک نے مکمل طور پر اپنی حالت بدل دی ہے۔ان کاکہنا تھا’’ سال۲۰۱۹۔۲۰۲۰ میں بینک کو ۱۱۳۹ کروڑ روپے کا نقصان ہوا تھا، تاہم چار سال کے اندر یہ منافع میں بدل گیا اور سال۲۰۲۳۔۲۰۲۴ میں اس نے ۱۷۰۰ کروڑ روپے کا منافع درج کیا‘‘۔
شری امیتاوا چیٹرجی، منیجنگ ڈائریکٹر اور سی ای او جے اینڈ کے بینک نے بینک کی کارکردگی اور آئندہ کے روڈ میپ کا خاکہ پیش کیا۔
چیٹر جی نے اعادہ کیا کہ جے اینڈ کے بینک بہترین بینکنگ خدمات فراہم کرنے کے ساتھ ساتھ مشن یوا کے تحت شمولیتی، منصفانہ اور پائیدار معاشی ترقی میں فعال کردار ادا کرنے کے لیے پرعزم ہے۔
یہ اطلاع دی گئی کہ جے اینڈ کے بینک نے تاریخی آمدنی کی ہیٹ ٹرک مکمل کی ہے اور مالی سال۲۰۲۴۔۲۰۲۵میں اپنی تاریخ کا سب سے زیادہ خالص منافع۲۰۸۲ کروڑ روپے درج کیا ہے۔