رائے گڑھ ریلوے اسٹیشن پر ریلوے چائلڈ ہیلپ ڈیسک کا آغاز

بچوں کے تحفظ اور مدد کے مقصد سے چھتیس گڑھ کے رائے گڑھ کے ریلوے اسٹیشن پر ریلوے چائلڈ ہیلپ ڈیسک شروع کیا گیا ہے ، یہ پہل محکمہ فروغ برائے خواتین و اطفال کے چائلڈ پروٹیکشن یونٹ کے ذریعے کی گئی ہے ۔
یہ اطلاع دیتے ہوئے چائلڈ پروٹیکشن یونٹ کے شوبھندر ڈنسینا نے کہا کہ اس ہیلپ ڈیسک کا بنیادی مقصد ریلوے اسٹیشن پر پریشان بچوں کی شناخت کرنا اور انہیں بروقت مدد فراہم کرنا ہے ۔ اگر کوئی بچہ چائلڈ میرج، چائلڈ لیبر، بھیک مانگنے یا اسمگلنگ جیسی سرگرمیوں کا شکار ہو رہا ہے تو ایسے معاملات میں فوری مداخلت کی جائے گی۔
انہوں نے کہا کہ کئی بار بچے اکیلے اسٹیشن پر پہنچ جاتے ہیں، گم ہو جاتے ہیں یا اپنے خاندان سے الگ ہو جاتے ہیں۔ ایسی صورت حال میں یہ ہیلپ ڈیسک بچوں کو محفوظ مقام پر لے جانے اور انہیں ان کے خاندان سے ملانے کا کام کرے گا۔ اس کے علاوہ یہ ڈیسک ان بچوں کے لیے مددگار ثابت ہو گا، جنہیں مدد اور رہنمائی کی ضرورت ہے ۔
ہیلپ ڈیسک پر تربیت یافتہ عملہ تعینات کیا گیا ہے ، جو بچوں کے مسائل کو سمجھنے اور فوری کارروائی کرنے کی صلاحیت رکھتے ہیں۔ یہ ڈیسک ریلوے پولیس، چائلڈ لائن، ضلعی انتظامیہ اور دیگر معاون اداروں کے ساتھ مل کر کام کرے گا۔