عالمی باکسنگ: سمت اور نیرج نے مختلف انداز میں جیت درج کی

لیورپول، 05 ستمبر (یواین آئی) سمت کُندو (مرد 75 کلوگرام) اور نیرج پھوگاٹ(خواتین 65 کلوگرام) نے مختلف انداز میں جیت درج کرتے ہوئے اپنے اپنے وزن کے زمرے کے پری کوارٹر فائنل میں داخلہ حاصل کیا۔ جمعہ کو برطانیہ کے لیورپول میں عالمی باکسنگ چیمپئن شپ میں ہندوستانی باکسرز کا دباؤ برقرار رہا۔
مردوں کے 75 کلوگرام زمرے کے پہلے راؤنڈ میں سمت کو اردن کے محمد الحُسین کے خلاف تینوں راؤنڈز میں کوئی دشواری نہیں ہوئی اور انہوں نے 5-0 سے جیت حاصل کی، جبکہ نیرج کو فن لینڈ کی کرسٹا کوولینن کو ہرانے کے لئے سخت محنت کرنی پڑی اور 3-2 سے کامیابی پائی۔
ہندوستان نے حال ہی میں تشکیل شدہ بین الاقوامی باکسنگ ریگولیٹری ادارے، ورلڈ باکسنگ کے زیر اہتمام منعقد ہونے والی پہلی عالمی چیمپئن شپ میں 20 رکنی مضبوط دستہ اتارا ہے اور برازیل اور قازقستان میں منعقدہ ورلڈ باکسنگ کپ میں اپنی شاندار کارکردگی کو جاری رکھنا چاہتا ہے۔
نیرج پھوگاٹ مقابلے کے دوسرے دن سب سے پہلے رنگ میں اتریں اور فن لینڈ کی قومی چیمپئن کوولینن کی دوسرے راؤنڈ میں شاندار واپسی کے باعث دباؤ میں تھیں۔ لیکن تیسرے راؤنڈ میں ہندوستانی کھلاڑی نے اپنی حریف پر زبردست حملہ کیا اور پانچ میں سے چار ججوں کی حمایت حاصل کر کے مقابلہ جیت لیا۔
اس کے بعد سمت نے الحُسین کے خلاف تینوں راؤنڈز میں غلبہ بناتے ہوئے راؤنڈ 16 میں جگہ بنائی۔