دھونی کی طرح ٹیم کی قیادت کروں گی: فاطمہ ثنا

پاکستان ویمن کرکٹ ٹیم کی کپتان فاطمہ ثنا کا کہنا ہے کہ ورلڈ کپ میں سابق ہندوستانی کپتان دھونی کی طرح ٹیم کی قیادت کروں گی۔پاکستان ویمن ٹیم کی کپتان فاطمہ ثنا نے کہا کہ وہ ایم ایس دھونی سے متاثر ہیں ،ہندوستان اور چنئی سپر کنگز دونوں کے ساتھ دھونی کی کپتانی کو قریب سے دیکھا اور ان کے میچز اور انٹرویوز دیکھ کر قیادت کے بارے میں سبق سیکھا ہے۔انہوں نے کہا کہ ورلڈ کپ جیسے بڑے ٹورنامنٹ میں کپتانی کرتے وقت تھوڑا سا گھبراہٹ محسوس کرنا فطری ہے لیکن میں مہندر سنگھ دھونی سے تحریک لیتی ہوں۔
فاطمہ ثنا نے کہا کہ دھونی جس طرح میدان میں فیصلہ سازی، پرسکون اور کھلاڑیوں کی پشت پناہی کرتے ہیں اس سے سیکھنے کے لیے بہت کچھ ہے، جب میں کپتان بنی تو میں نے خود سے کہا کہ دھونی کی طرح بننا چاہتی ہوں۔
انہوں نے پاکستان ٹیم کے ورلڈ کپ سیمی فائنل میں پہنچنے کو ہدف بنایا ہے اور انہیں یقین ہے کہ نوجوان اسکواڈ اچھی کارکردگی کا مظاہرہ کرے گا۔ فاطمہ ثنا نے مزید کہا کہ ہم ماضی پر توجہ نہیں دیں گے، میرا مقصد ٹیم کو سیمی فائنل تک لے جانا ہے۔