راجگیر، 29 اگست (یو این آئی) ہندوستانی مردوں کی ہاکی ٹیم نے ہیرو مینس ایشیا کپ راجگیر بہار 2025 میں اپنی مہم کا آغاز جمعہ کو چین کے خلاف 4-3 سے جیت کے ساتھ کیا۔
آج یہاں راجگیر ہاکی اسٹیڈیم میں کھیلے گئے میچ میں کپتان ہرمن پریت سنگھ نے (20ویں، 33ویں، 47ویں) منٹ میں گول کر کے ہندوستان کی ہیٹ ٹرک کی۔ ہندوستان کی جانب سے پہلا گول جوگراج سنگھ نے (18ویں) منٹ میں کیا۔ دوسری جانب چین کی جانب سے شیہاؤ ڈو (12ویں)، بینہائی چن (35ویں) اور جیشینگ گاؤ (41ویں منٹ) نے گول کئے۔
ہندوستانی مردوں کی ہاکی ٹیم نے شروع سے ہی جارحانہ موقف اپنایا۔ آخر کار چین نے دباؤ بنایا اور پنالٹی کارنر حاصل کیا جسے شیہاؤ ڈو (12ویں منٹ) نے گول میں تبدیل کرکے اپنی ٹیم کو برتری دلادی۔ چین پہلے کوارٹر میں 1-0 سے آگے تھا۔
ہندوستان نے دوسرے کوارٹر کا آغاز جارحانہ انداز میں کیا اور چین پر دباؤ ڈالنے میں اچھا مظاہرہ کیا۔ کوارٹر میں تین منٹ بعد ہندوستان کو پنالٹی کارنر ملا اور جوگراج سنگھ (18ویں منٹ) نے گول کرکے اسکور 1-1 کردیا۔ اس کے فوراً بعد ہندوستان کو ایک اور پنالٹی کارنر ملا اور کپتان ہرمن پریت سنگھ (20ویں منٹ) نے گول کرکے ہندوستان کو برتری دلادی۔ ہاف ٹائم تک ہندوستان 2-1 سے آگے تھا۔
وقفے کے بعد ہندوستان نے چینی کھلاڑیوں پر دباؤ ڈالنے کی کوشش کی اور کپتان ہرمن پریت سنگھ (33ویں منٹ) نے پنالٹی کارنر پر گول کرکے اسکور 3-1 کردیا۔ چین نے جلد ہی شاندار جواب دیا اور اپنا تیسرا پنالٹی کارنر حاصل کیا جسے بینہائی چن (35ویں منٹ) نے گول کر کے اسکور 3-2 کر دیا۔ اگلے چند منٹوں تک ہندوستان اور چین ایک دوسرے پر حملے کرتے رہے جس میں چین کا جارحانہ موقف کافی خطرناک نظر آیا۔ کھیل ختم ہونے سے 20 منٹ قبل چین کو دو پنالٹی کارنر ملے اور دوسرے پنالٹی کارنر پر جیشینگ گاؤ (41ویں منٹ) نے گول کر کے برابری کر دی۔ کوارٹر کے اختتام تک دونوں ٹیمیں 3-3 سے برابر تھیں اور کھیل مکمل طور پر متوازن تھا۔
ہندوستان نے آخری کوارٹر کا آغاز شاندار انداز میں کیا، شروع میں ہی دو پنالٹی کارنر ملے اور ہرمن پریت سنگھ (47ویں منٹ) نے گول کر کے اپنی ہیٹ ٹرک مکمل کر کے ٹیم کو 4-3 کی برتری دلائی۔ اس کے بعد ہندوستانی ٹیم نے چینی کھلاڑیوں کو گول کرنے کا کوئی موقع نہیں دیا۔ ہندوستانی ٹیم نے یہ میچ 4-3 سے جیت لیا۔یو این آئی۔ این یو۔
