ہرمن پریت اور مندھانا کو گھر پر ورلڈ کپ جیتنے کا یقین

ممبئی، 12 اگست (یو این آئی) ہندوستان کی سینئر جوڑی ہرمن پریت کور اور اسمرتی مندھانا نے ٹیم کی حالیہ کارکردگی، اجتماعی اعتماد اور پچھلے دنوں میں بدلے ہوئے تیاری کے طریقوں پر بھروسہ ظاہر کرتے ہوئے پہلا ون ڈے ورلڈ کپ جیتنے کی امید ظاہر کی ہے۔
آٹھ ٹیموں پر مشتمل یہ ٹورنامنٹ 30 ستمبر سے ہندوستان میں شروع ہوگا، جہاں ہندوستان کا پہلا میچ سری لنکا سے ہوگا۔ ہندوستان پچھلی بار 2022 کے ون ڈے ورلڈ کپ میں سیمی فائنل تک بھی نہیں پہنچ سکا تھا۔ ہندوستان کی اب تک کی بہترین کارکردگی 2005 اور 2017 میں رہی ہے، جب دونوں مرتبہ ٹیم رنر اپ رہی تھی۔ ان دونوں مواقع پر ٹیم کی کپتان متھالی راج تھیں۔ اس بار ٹیم گھریلو میدان اور حالیہ فارم کی بنیاد پر ایک قدم آگے بڑھنے کی امید کر رہی ہے۔ ٹیم کی نائب کپتان مندھانا نے کہا کہ ٹیم کی حالیہ فارم کی ایک بڑی وجہ میدان سے باہر کی تیاریاں بھی ہیں۔ انہوں نے کہا، ’’ہم جو ٹریننگ اور محنت کر رہے ہیں، اس کا نتیجہ مل رہا ہے۔ امید ہے کہ یہ ورلڈ کپ ہمارے لیے بہت خاص ہوگا۔ انگلینڈ میں پچھلے ڈیڑھ مہینے میں کئی مثبت چیزیں ہوئیں۔ میدان سے باہر بھی پوری ٹیم کا متحد رہنا اور ہر روز سخت محنت کرنا ہمارے لیے بہت اہم ہے۔‘‘
مندھانا نے کہا، ’’میرا ماننا ہے کہ میرے ذہنی نقطۂ نظر سے زیادہ پچھلے دو تین سال میں میرے کام کرنے کے طریقہ کار میں کافی تبدیلی آئی ہے۔ یہ ایک تبدیلی ہے۔ میدان میں کیا ہوتا ہے، یہ الگ بات ہے۔ ہماری پہلی ذمہ داری اپنا کام کرنا ہے۔ صرف میں ہی نہیں بلکہ پوری ٹیم اسی سمت بڑھ رہی ہے، جہاں ہمیں پتہ ہے کہ کس جگہ محنت کرنی ہے۔ ہم ان چیزوں کو لے کر بالکل واضح ہیں۔ پچھلے ڈیڑھ سال میں یہ میرے لیے اور ٹیم کے اندر بھی ایک بڑی تبدیلی رہی ہے۔‘‘
آسٹریلیا پچھلے سال ٹی-20 ورلڈ کپ کے فائنل میں نہیں پہنچ پایا تھا۔ ہرمن پریت نے کہا کہ فائنل میں آسٹریلیا کے بجائے دو دیگر ٹیموں کو دیکھنا ایک اچھا بدلاؤ تھا۔ انہوں نے کہا، ’’اب ہر ٹیم نے کافی ترقی کی ہے اور آپ نہیں جانتے کہ کون سی ٹیم ٹاپ-4 میں ہوگی۔ یہ اچھی بات ہے کیونکہ پہلے وہ بہت بڑی ٹیم تھی۔ ایک ٹیم کا فائنل میں ہونا طے ہوتا تھا۔ لیکن اب سب کھلا ہے، تو یہ صرف اس دن اچھا کرکٹ کھیلنے اور اپنی بہترین کارکردگی کا مظاہرہ کرنےکی بات ہے۔‘‘
ہندوستانی ٹیم کی کپتان ہرمن پریت نے ممبئی میں ورلڈ کپ کے 50 دن کے کاؤنٹ ڈاؤن آئی سی سی ایونٹ کے دوران کہا، ’’گھریلو شائقین کے سامنے کھیلنا ہمیشہ خاص ہوتا ہے اور امید ہے کہ اس بار ہم 100 فیصد دیں گے۔ ہم اس رکاوٹ کو ختم کرنے کی کوشش کریں گے جس کا انتظار تمام ہندوستانی شائقین برسوں سے کر رہے ہیں۔‘‘
ہندوستان اس سال ون ڈے میں شاندار فارم میں رہا ہے اور اب تک کھیلے گئے 11 میں سے نو میچ جیتے ہیں۔ ان میں آئرلینڈ پر 3-0 کی فتح، سری لنکا میں سہ فریقی سیریز جیت اور حال ہی میں انگلینڈ میں 2-1 کی سیریز جیت شامل ہیں۔ ون ڈے رینکنگ میں دوسرے نمبر پر موجود انگلینڈ کے خلاف جیت نے یقیناً گھریلو ورلڈ کپ سے پہلے ان کا اعتماد بڑھایا ہوگا۔
یواین آئی۔ م س