سرینگر//
سرینگر کے نوگام علاقے میں سرینگر، جموں قومی شاہراہ پر دوران شب ایک دلدوز سڑک حادثے میں جموں و کشمیر پولیس کے دو افسروں کی موت جبکہ تیسرا زخمی ہوگیا۔
افسران نے بتایا کہ نوگام کے نزدیک نوگام بائی پاس پر ایک گاڑی ایک ڈوائیڈر سے ٹکرائی جس کے نتیجے میں اس میں سوار جموں و کشمیر پولیس کے تین سب انسپکٹر زخمی ہوگئے ۔
انہوں نے کہا کہ زخمیوں کو علاج و معالجے کے لئے اسپتال منتقل کیا گیا جہاں موجود ڈاکٹروں نے ان میں سے دو کو مردہ قرار جبکہ تیسرا زیر علاج ہے ۔
بتایا جاتا ہے کہ یہ پولیس افسران شری امرناتھ یاترا کی ڈیوٹی انجام دینے کے بعد سری نگر سے جموں جا رہے تھے ۔
متوفین کی سچن ورما جو آئی آو پی کے۲۳بٹالین سے وابستہ تھا اور پانتھہ چوک میں تعینات تھا اور شبم سیٹ جو آئی آر پی کی ۲۱ویںبٹالین سے وابستہ تھا اور اونتی پورہ میں تعینات تھا جبکہ زخمی مستان سنگھ آئی آر پی کی۲۳ویںبٹالین سے وابستہ ہے ۔
دریں اثنا پولیس نے اس ضمن میں ایک کیس درج کرکے مزید تحقیقات کارروائیاں شروع کی ہے۔
ادھرلیفٹیننٹ گورنر منو ج سِنہانے حادثے میں جموں و کشمیر پولیس کے۲۳ویں بٹالین آئی آر پی کے پی ایس آئی سچن ورما اور بٹالین آئی آر پی کے پی ایس آئی شبھم سیٹھ کی موت پر گہرے دُکھ کا اِظہار کیا ہے۔
لیفٹیننٹ گورنر نے کہا ’’میںنوگام سری نگر میں پیش آئے المناک سڑک حادثے سے بہت غمزدہ ہوں۔ یہ نہایت دُکھ کی بات ہے کہ اِس سڑک حادثے میں دو پی ایس آئی سچن ورما اور شبھم سیٹھ اَپنی جان سے ہاتھ دھو بیٹھے۔ہم قوم کیلئے اُن کی مثالی خدمات کو کبھی فراموش نہیں کریں گے۔ مرحومین کے اہلِ خانہ کے ساتھ میری دلی تعزیت ہے۔ غم کی اِس گھڑی میں پوری قوم اُن کے ساتھ کھڑی ہے۔‘‘
