سرینگر//
انسپکٹر جنرل آف پولیس (آئی جی پی) کشمیر وی کے بردی کا کہنا ہے کہ یوم آزادی کی تقریبات کے پر امن انعقاد کو یقینی بنانے کیلئے کثیر سطحی حفاظتی انتظامات کیے جارہے ہیں۔
بردی نے کہا کہ۱۵؍اگست کی تقریبات کے پیش نظر یہاں ڈرل ریہرسل ہو رہی ہے ۔
آئی جی پی نے ان باتوں کا اظہار پیر کو یہاں لال چوک میں بلیدان استمبھ کا دورہ کرنے کے بعد نامہ نگاروں کے ساتھ بات کرنے کے دوران کیا۔
بردی نے کہا’’۱۵؍اگست کی تقریبات کے پیش نظر یہاں ڈرل ریہرسل ہو رہی ہے اور کثیر سطحی سیکورٹی انتظامات کئے جا رہے ہیں‘‘۔
آئی جی پی کا کہنا تھا’’جموں کشمیر پولیس، نیم فوجی دستوں کے ساتھ مل کر کثیر سطحی حفاظتی انتظامات کو یقینی بنائے گی‘‘۔انہوں نے مزید کہا کہ یوم آزادی کی تقریبات کے پر امن انعقاد کو یقینی بنانے کیلئے کثیر سطحی سیکورٹی انتظامات کئے جارہے ہیں۔
ادھرجموں کشمیر میں۱۵؍اگست کے موقع پر یومِ آزادی کی تقریبات کو پُرامن اور محفوظ بنانے کیلئے سخت ترین سیکورٹی انتظامات عمل میں لائے گئے ہیں۔
دارالحکومت سرینگر سمیت وادی کے تمام اضلاع میں پولیس اور نیم فوجی دستوں نے چوکسی بڑھا دی ہے ، جب کہ داخلی و خارجی راستوں پر خصوصی ناکہ چیکنگ پوائنٹس قائم کیے گئے ہیں۔
سرینگر کے مرکزی علاقوں لال چوک، ڈل گیٹ اور بٹہ مالو میں پولیس اور سی آر پی ایف اہلکاروں کی بھاری نفری تعینات ہے ۔
گاڑیوں کی باریک بینی سے تلاشی لی جا رہی ہے اور ڈرائیور و مسافروں کے شناختی کارڈ بھی چیک کیے جا رہے ہیں۔ اسی طرح جنوبی کشمیر کے اضلاع پلوامہ، شوپیاں، کولگام اور اننت ناگ میں بھی سیکورٹی الرٹ جاری ہے اور ہر آنے جانے والے پر سخت نظر رکھی جا رہی ہے ۔
پولیس حکام کے مطابق تمام اضلاع میں تھری لئیر سیکورٹی سسٹم نافذ کیا گیا ہے ، جس میں سڑکوں پر گشت، ناکہ چیکنگ اور حساس مقامات پر کمانڈوز کی تعیناتی شامل ہے ۔ پولیس کا کہنا ہے کہ کسی بھی مشکوک نقل و حرکت پر فوری کارروائی کی جائے گی۔
شمالی کشمیر کے بارہمولہ اور کپواڑہ میں بھی حساس مقامات پر سی سی ٹی وی نگرانی کو مزید فعال بنا دیا گیا ہے ، جبکہ فوج اور بی ایس ایف کے دستے سرحدی علاقوں میں گشت بڑھا رہے ہیں تاکہ دراندازی یا کسی بھی ممکنہ تخریب کاری کو روکا جا سکے ۔
ایک سینئر پولیس افسر نے بتایا’’یومِ آزادی کے پیش نظر وادی بھر میں سیکورٹی ہائی الرٹ پر ہے ۔ ہمارا مقصد یہ یقینی بنانا ہے کہ تقریبات میں کوئی رکاوٹ نہ آئے اور عوام مکمل تحفظ کے ساتھ دن منائیں۔‘‘
سینئر سپرنٹنڈنٹ آف پولیس (ایس ایس پی) بارہمولہ ‘گوریندر پال سنگھ کا کہنا ہے کہ ضلع بھر میں۱۴۷ مقامات پر یوم آزادی کی تقریبات کا اہتمام کیا جائے گا جن کے لئے سیکورٹی کے سخت انتظامات کئے جا رہے ہیں۔
سنگھ نے کہا کہ لائن آف کنٹرول (ایل او سی) کے آس پاس صورتحال نارمل ہے اور سیکورٹی فورسز کسی بھی گڑ بڑ سے نمٹنے کیلئے تیار ہیں۔
ایس ایس پی نے ان باتوں کا اظہار پیر کو یہاں نامہ نگاروں کے سوالوں کا جواب دینے کے دوران کیا۔
سنگھ نے کہا’’یوم آزادی کی تقریبات کے پیش نظر سیکورٹی کے پختہ انتظامات کئے جا رہے ہیں اور ضلع بھر میں۱۴۷مقامات پر یوم آزادی کی تقریبات کا اہتمام کیا جائے گا جن کیلئے سخت سیکورٹی انتظامات کئے جا رہے ہیں‘‘۔
ایس ایس پی کا کہنا تھا کہ اس کے علاوہ ضلع میں ’ہر گھر ترنگا‘مہم جاری ہے اور ہر روز۳سے۴ریلیاں بر آمد ہوتی ہیں ان کیلئے بھی سیکورٹی کے پختہ انتظامات کئے گئے ہیں۔
ایس ایس پی نے کہا کہ ایل او سی کے آس پاس صورتحال بالکل نارمل ہے اور ہمارے پورے انتظامات بھی ہیں۔انہوں نے کہا کہ سیکورٹی فورسز کسی بھی گڑ بڑ سے نمٹنے کیلئے تیار ہیں۔
