جونیئر مرد ہاکی ورلڈ کپ میں 24 ٹیمیں حصہ لیں گی، ہندوستان اور پاکستان پول بی میں

لوزان، (سوئزرلینڈ//تمل ناڈو کے چنئی اور مدورے میں منعقد ہونے والے ایف آئی ایچ ہاکی مرد جونیئر ورلڈ کپ میں 24 ٹیمیں حصہ لیں گی۔ ہفتہ کو ہونے والے ڈرا میں ان ٹیموں کو چھ پولز میں تقسیم کیا گیا ہے۔ ہندوستان اور روایتی حریف پاکستان کو پول ’بی‘ میں رکھا گیا ہے۔
آج یہاں سوئزرلینڈ کے لوزان میں منعقدہ ہاکی مرد جونیئر ورلڈ کپ کی ڈرا تقریب میں ایف آئی ایچ کے صدر طیب اکرام نے ہاکی انڈیا کے سیکریٹری جنرل بھولا ناتھ سنگھ اور ہاکی انڈیا کے ڈائریکٹر جنرل کمانڈر آر کے شریواستو کے ساتھ ڈرا تقریب میں حصہ لیا۔ ٹورنامنٹ میں 24 ٹیمیں حصہ لیں گی اور انہیں چھ پولز میں تقسیم کیا گیا ہے۔
پول اے: جرمنی، جنوبی افریقہ، کینیڈا اور آئرلینڈ
پول بی: ہندوستان، پاکستان، چلی اور سوئٹزرلینڈ
پول سی: ارجنٹینا، نیوزی لینڈ، جاپان اور چین
پول ڈی: سپین، بیلجیم، مصر اور نمیبیا
پول ای: نیدرلینڈز، ملائیشیا، انگلینڈ اور آسٹریا
پول ایف: فرانس، آسٹریلیا، کوریا اور بنگلہ دیش
اس موقع پر طیب اکرام نے کہا، “میرے لیے یہ بہت خوشی کی بات ہے کہ ہم اس اہم لمحے سے پہلے یہاں آئے ہیں، کیونکہ ہم پہلی بار 24 ٹیموں والے ایف آئی ایچ جونیئر ہاکی ورلڈ کپ کا انعقاد کرنے جا رہے ہیں۔ یہ ابھرتے ہوئے ممالک سمیت تمام ممالک کے نوجوانوں کو بااختیار بنانے اور انہیں شامل کرنے کی ایف آئی ایچ حکمت عملی کا حصہ ہے، اور یہ ایونٹ اس سمت پہلا قدم ہوگا۔ میں تمل ناڈو کے وزیر اعلیٰ ایم کے اسٹالن اور نائب وزیر اعلیٰ اودے ندھی اسٹالن کا شکریہ ادا کرتا ہوں، جنہوں نے تمل ناڈو کے نوجوان ستاروں کا چنئی اور مدورے کے دو خوبصورت شہروں میں خیرمقدم کیا۔ میں ہندوستانی وزیر اعظم نریندر مودی اور ہندوستان کے کھیلوں کے وزیر منسکھ ایل مانڈویہ کا بھی شکریہ ادا کرنا چاہتا ہوں۔”
ہاکی انڈیا کے سیکریٹری جنرل بھولا ناتھ سنگھ نے کہا، “ہاکی کی دنیا کے لیے آج ایک تاریخی لمحہ ہے۔ ہم 24 ممالک کی شرکت کے ساتھ پہلے ایف آئی ایچ جونیئر مرد ہاکی ورلڈ کپ کے لیے پول ڈرا دیکھ رہے ہیں۔ ہاکی انڈیا کی جانب سے، میں وزیر اعظم نریندر مودی کا پورے ملک میں ہاکی اور اس کے کھلاڑیوں کے تئیں ان کے مضبوط تعاون کے لیے دل سے شکریہ ادا کرتا ہوں۔”